Fil-Messiku jinqatel Alejandro Martinez, ġurnalist Messikan li kien jirrapporta dwar il-kriminalità vjolenti.
Martinez kien qed jivvjaġġa b’karozza ma’ żewġ gwardjani tas-sigurtà fl-istat ċentrali ta’ Guanajuato, il-Messiku. Skont rapporti internazzjonali, l-irġiel, li l-identità tagħhom għadha mhix magħrufa, kienu armati meta sparaw tiri lejn Martinez.
Hu miet l-isptar minn feriti tal-balal li sofra waqt din l-isparatura.
Alejandro Martinez kien taħt il-protezzjoni tal-Pulizija wara li fl-2022 salva minn attakk simili u kien assenjat gwardjani tas-siġurtà taħt il-programm federali għall-ġurnalisti.
L-awtoritajiet lokali qalu li l-irġiel armati bdew jisparaw minn pickup truck fuq il-karozza li fiha kien hemm il-ġurnalist Martinez.
Alejandro Martinez, li kien magħruf bħala “The Son of the Lone Ranger”, kien imexxi sit popolari fuq il-midja soċjali, fejn kellu iżjed minn 340,000 segwaċi.
Intant, il-Messiku jitqies bħala wieħed mill-pajjiżi perikolużi għall-ġurnalisti, fejn iżjed minn 150 ħaddiem fil-midja nqatlu mill-1994 ‘il hawn.
