Propju jumejn wara li l-organizzazzjoni dinjija tas-saħħa iddikjarat il-monkeypox emerġenza tas-saħħa globali, l-Isvezja rrappurtat l-ewwel każ ta’ monkeypox mill-varjant il-ġdid.
Waqt konferenza tal-aħbarijiet li saret l-Erbgħa intqal li fi 13-il pajjiż fil-kontinent Afrikan kien hemm żieda sostanzjali tal-monkeypox fosthom f’pajjiżi li qatt ma rreġistraw każijiet – fosthom f’Burundi, Kenya, Rwanda u l-Uganda.
Il-monkeypox hija marda li fil-passat infirxet minħabba numru kbir ta’ każijiet fir-Repubblika Demokratika tal-Kongo.
Sorsi qrib l-awtoritjiet tas-saħħa pubblika spjegaw ma’ Net News li bħalissa hawn żewġ tipi ta’ monkeypox; clade 1 u clade 2.
Il-clade 1 huwa l-varjant l-aktar serju, u kien għalhekk li d-WHO iddikjarat emerġenza tas-saħħa globali.
Apparti minn hekk, l-esperti tas-saħħa pubblika illi tkellmu ma’ dan l-istazzjon qalulna li preżentament m’hawnx każijiet ta’ monkeypox f’Malta. U għalhekk is-sitwazzjoni mhijiex waħda allarmanti.
Iżda minn naħa l-oħra l-proċeduri li kienu daħlu fis-seħħ fl-2022 xorta għadhom jitħaddmu.
Il-varjant il-ġdid jinfirex l-aktar sesswalment. Pero xorta waħda jista’ jinfirex jekk wieħed ikun f’kuntatt ma’ persuna li jkollha l-virus.
U allura, l-awtoritajiet appellaw li jekk wieħed ikun mar f’wieħed minn dawn il-pajjiżi varji u jkun ġie f’kuntatt ma xi ħadd għandu jiċċekkja b’mod immedjat. Is-sintomi tal-monkeypox jistgħu joħorġu bejn sitt ijiem u 21 jum minn mindu tkun f’kuntatt ma’ persuna bil-monkeypox.
Intant, kollox jindika li s’issa il-monkeypox mhuwiex inkwetanti fl-Ewropa hekk kif s’issa ġie rreġistrat każ wieħed biss. U m’hawn l-ebda każijiet f’pajjiżna.
