Kellu ħajja ta’ servizz kontinwu – servizz għal dak li kien tant għal qalbu.
Mill-familja, għall-isport, għax-xogħol tiegħu – Hugh kien tassew bniedem ta’ servizz.
Dan kien il-messaġġ illi twassal fl-omelija li saret waqt il-funeral ta’ Hugh Caruana; ex player ta’ Floriana FC u Sliema WFC kif ukoll eks kollega fuq Net Television illi miet fl-eta ta’ 78 sena. Fil-karriera sportiva tiegħu fil-football Hugh Caruana rebaħ l-unuri kollha li joffri l-football Malti u aktar tard ta kontribut fil-qasam tal-ġurnaliżmu sportiv f’parteċipazzjoni twila fil-programm Replay fuq NET TV. Hugh Caruana baqa’ jsegwi l-logħob tal-football b’mod regolari u kien personalità dejjem preżenti fl-Istadium Nazzjonali.
Għall-funral tiegħu, il-Knisja ta’ Ġesù Nazzarenu f’Tas-Sliema kienet ippakjata bin-nies – knisja li kien jiffrekwenta spiss b’imħabba kbira.
Matul din ic-celebrazzjoni funebri, Hugh Caruana ġie deskritt mill-konċelebrant bħala bniedem li ta servizz – mhux biss fil-qasam sportiv, iżda fuq kollox servizz lill-familja tiegħu u anke lil Alla.
Wara li rtira minn player, Hugh Caruana kien beda karriera bħala kowċ fejn kien kowċ ta’ Floriana FC u ta’ Sliema WFC. L-aqwa perjodu ta’ Hugh Caruana bħala kowċ u amministratur tal-futbol, jibqa’ fiż-żmien meta kien hemm Robert Arrigo President fit-tmun ta’ Sliema Wanderers, b’tim imżejjen bl-aqwa plejers.
Kien wara li temm il-karriera tiegħu bħala kowċ, li Hugh Caruana ingħaqad mat-tim ta’ Replay fuq Net Television.
Apparti l-karriera tiegħu fl-isports, Hugh Caruana kien ukoll Kunsillier lokali f’isem il-Partit Nazzjonalista fejn sa Ġunju li għadda kien baqa’ jaħdem fil-lokalità tal-Gżira b’lealtà sħiħa lejn il-poplu Gżirjan u l-Partit Nazzjonalista.
Preżenti għall-funeral kien hemm l-Aġent President ta’ Malta Francis Zammit Dimech, l-ex Prim Ministru Lawrence Gonzi, il-Viċi Kap tal-Partit Nazzjonalista Alex Perici Calascione, deputati u kunsilliera f’isem il-Partit Nazzjonalista kif ukoll numru ta’ ex players li lagħbu ma’ Hugh Caruana tul il-karriera tiegħu flimkien ma’ players li jiftakruh bħala kowċ kif ukoll uffiċjali tal-MFA.
Fi tmiem il-quddiesa presente cadavere, il-kongregazzjoni sellmet għall-aħħar darba lil Hugh Caruana b’ċapċipa twila b’sens ta’ gratitudni lejn il-kontribut li Hugh Caruana ta fis-soċjetà. Fuq it-tebut ta’ Hugh Caruana tpoġġa bukkett fjuri, flokk tal-football ta’ Floriana FC u bandiera ta’ Sliema WFC, iż-żewġ klabbs li magħhom lagħab Hugh Caruana.
