Raġel li spiċċa arrestat wara li ġie osservat jiġbor id-droga li kienet tinsab fil-ġnien tal-parkeġġ f’Paceville, wieġeb ħati tal-akkużi relatati. Hussein Abdullahi Jama ta’ 28 sena residenti l-Marsa, minn Somaliland, tressaq il-Qorti taħt arrest quddiem il-Maġistrat Donatella Frendo Dimech – akkużat b’pussess ta’ cannabis u kokaina f’ċirkostanzi li jindikaw li d-droga ma kinitx maħsuba biss għall-konsum personali tiegħu.
L-Ispettur Mark Cremona qal lill-Qorti li fis-7 ta’ Settembru, ronda tal-Pulizija f’Paceville f’zona magħrufa sew għat-traffikar tad-droga, wasslet biex iż-żagħżugħ ta’ 28 sena ġie arrestat f’San Ġiljan, is-Sibt filgħaxija, fuq suspett ta’ traffikar ta’ droga wara li l-Pulizija nnotat li kien qed jaġixxi b’mod stramb, kien jidher li qed ifittex xi ħaġa fit-tarf ta’ parkeġġ fi Triq San Ġorg.
Wara li osservaw lir-raġel qed jirkupra oġġetti mill-art u jpoġġihom fil-qmis, l-uffiċjali bdew isegwu l-movimenti tiegħu aktar mill-viċin. Dan il-fatt ċarament wassal biex werwer lir-raġel, li mbagħad beda jaġixxi b’mod aktar suspettuż.
Il-Pulizija waqqfu lir-raġel u fittxewlu, u sabu borża sewda li kien fiha 38 qartas li kien fihom sustanza bajda li aktar tard is-suspettat ikkonferma li hija kokaina, lesta biex tinbiegħ, u €450 f’karti ta’ €20 u €10. Fil-post fejn kien deher jiġbor xi ħaġa, il-Pulizija sabet ukoll numru żgħir ta’ qratas li kien fihom il-cannabis.
Fi tfittxija sussegwenti li saret fid-dar tiegħu, skoprew noti flimkien ma’ oġġetti relatati mat-traffikar tad-droga, li l-ispettur qal li kienu jikkonsistu f’diversi mowbajls, qratas vojta u pipa.
Il-Qorti differit il-kawża għas-sentenza.
