L-Għaqda Nazzjonali Każini tal-Banda qed tħabbar sensiela ta’ attivitajiet speċjali biex jiċċelebraw il-ħajja u l-wirt tal-kompożitur leġġendarju Giacomo Puccini. Minn Ottubru sa Diċembru 2024, se jittellgħu diversi attivitajiet, inklużi dawk kulturali, dwar l-influwenza dejjiema ta’ Puccini fuq il-mużika klassika u l-arti.
Esebizzjoni partikolari se tkun dedikata għall-passjoni li Puccini kellu għall-fotografija, aspett artistiku tiegħu li ma tantx hu magħruf. L-esebizzjoni se tittella’ fid-daħla tal-Parlament u fiha se jintwerew ritratti rari meħuda minn Puccini stess, ittri personali, u oġġetti oħra. Il-wirja toffri daqqa t’għajn lill-aspett artistiku ta’ Puccini ’l hinn mill-mużika ikonika tiegħu. Din l-esebizzjoni se tkun qed tittella’ bejn it-2 ta’ Ottubru u s-7 ta’ Diċembru.
Attività oħra hija l-kunċert speċjali minn żewġ tenuri u pjanist Taljani li se jsir fil-Berġa ta’ Kastillja waqt in-Notte Bianca, l-akbar lejla kulturali f’Malta. Din il-prestazzjoni intima toffri opportunità unika tal-mużika chamber ta’ Puccini f’ambjent storiku.
II-Kunċert tal-Orgni fil-Konkattidral ta’ San Ġwann, nhar id-29 ta’ Novembru, huwa kunċert li joffri l-kobor tal-mużika ta’ Puccini f’kattidral ferm storiku. F’dal-kunċert se jindaqqu siltiet ta’ mużika qawwija ħafna minn organista ta’ fama internazzjonali f’ambjent magħruf għas-sbuħija tal-arkitettura artistika kif ukoll l-akustika perfetta. Dan se jkun kunċert memorabbli li juri l-kobor tal-mużika ta’ Puccini.
Kunċert klassiku se jsir fit-Teatru Manoel, it-teatru nazzjonali ta’ Malta. F’dal-kunċert se jieħdu sehem mużiċisti famużi li se jdoqqu biċċiet l-aktar rinomati ta’ Puccini. Il-kunċert tas-6 ta’ Diċembru se jkun il-qofol ta’ din is-sensiela ta’ attivitajiet kommemorattivi li joffri lill-udjenza l-opportunità biex tesperjenza l-kobor u l-qawwa drammatika tal-mużika ta’ Puccini f’ambejnt tassew uniku.
Dawn l-attivitajiet jintemmu b’simpożju internazzjonali u t-tnedija ta’ ktieb, nhar is-7 ta’ Diċembru. Is-simpożju se jlaqqa’ esperti mid-dinja kollha biex jiddiskutu r-relevanza dejjiema ta’ Puccini f’kuntest kulturali kontemporanju. Din l-attività toffri diskussjonijiet, preżentazzjonijiet, u laqgħat interattivi li jeżaminaw l-influwenza ta’ Puccini fuq il-mużika moderna, it-teatru, u lil hinn.
Noel Camilleri, il-President tal-Għaqda Nazzjonali Każini tal-Banda, spjega kif waqt li qed jiġi ċċelebrat iċ-ċentinarju mill-mewt ta’ Giacomo Puccini, tajjeb li nitftakru fl-impatt qawwi li x-xogħol tiegħu għad għandu fuq id-dinja tal-mużika klassika u l-arti.
Dawn l-attivitajiet mhux biss jagħtu ġieħ lis-sehem kbir tiegħu, żied jgħid Camilleri, imma wkoll jistednuna nitgħallmu dwar aspetti oħra ta’ Puccini mhux daqshekk magħrufa, bħall-fotografija. Ix-xogħlijiet ta’ Puccini jmorru lil hinn miż-żmien u xi post partikulari, u dawn l-attivitajiet joffrulna l-opportunità biex nirriflettu dwar l-influwenza tiegħu anke seklu wara mewtu.
