Tħabbru r-rebbieħa tal-Premju Nazzjonali tal-Ktieb 2024 għal kotba ppubblikati fl-2023, waqt ċerimonja privata fil-Mużew Marittimu l-Birgu. Il-Premju Nazzjonali tal-Ktieb jittella’ kull sena mill-Kunsill Nazzjonali tal-Ktieb (KNK), u r-rebbieħa jintgħażlu minn bord indipendenti ta’ aġġudikanti skont damma ta’ kriterji stabbiliti u proċess rigoruż.
Fid-diskors tal-ftuħ, il-Kap Eżekuttiv tal-KNK Mark Camilleri nnota l-kisbiet tal-letteratura Maltija fl-2023 u l-isforzi tal-professjonisti biex l-istandards lokali jibqgħu jogħlew għal dawk internazzjonali. Enfasizza l-importanza tal-ħidma bejn il-KNK u l-awturi, l-edituri u l-pubblikaturi sabiex ix-xogħol lokali jitjieb. Camilleri semma wkoll xi inizjattivi li għaddejjin bħalissa, fosthom il-pubblikazzjoni tal-Katalgu tad-Drittijiet ta’ Barra u x-xogħol fuq iċ-Ċentru tal-Ktieb Malti, filwaqt li tenna l-impenn tal-KNK sabiex jitrawwem talent ġdid fl-industrija u jkunu promossi l-kotba Maltin barra minn xtutna. Feraħ lir-rebbieħa u l-finalisti kollha għall-kontribuzzjoni tagħhom lejn il-letteratura Maltija.
Ir-rebbieħa ntgħażlu minn 61 ktieb ippubblikati s-sena ta’ qabel u mifruxa fi 12-il kategorija kompetittivi: 49 minnhom kienu f’sitt kategoriji tal-Premju Nazzjonali tal-Ktieb għall-Adulti, u s-27 l-oħra fis-sitt kategoriji tal-Premju Terramaxka għat-Tfal u ż-Żgħażagħ. Skont ir-regolamenti, l-aġġudikanti kellhom jagħżlu sa massimu ta’ 5 kotba minn kull kategorija.
Il-bord tal-aġġudikanti tal-edizzjoni ta’ dis-sena għażlu li ma jinnominaw ebda finalist għall-kategorija tar-Rumanzi. L-għażla ttieħdet sabiex tinżamm l-ogħla riga letterarja u sabiex tkun assigurata l-integrità tal-Premju Nazzjonali tal-Ktieb. Il-bord qal li filwaqt li bosta mir-rumanzi kienu mirfuda minn riċerka storika estensiva, il-livell letterarju ma laħaqx dawk mistennija minn premju ta’ ġieħ nazzjonali.
Barra minn hekk, għall-kategorija tan-Novelli ntgħażlu biss żewġ finalisti, li ebda minnhom ma rebaħ il-premju għax ħadd ma laħaq id-90 marka.
Il-Premju Terramaxka dis-sena ċċelebra bosta kotba għat-tfal għall-kwalità għolja tagħhom kemm fil-kontenut u anki fil-produzzjoni. L-aġġudikaturi faħħru l-kotba għat-temi li esploraw, għall-illustrazzjonijiet kontemporanji, u għall-mod kreattiv li bih l-awturi u l-illustraturi indirizzaw suġġetti ġodda u importanti lill-udjenza tagħhom. Il-kotba rebbieħa għolew fuq l-oħrajn għall-kapaċità tagħhom li jsaħħru l-immaġinazzjoni tat-tfal bi stejjer viżivi li żiedu mal-esperjenza tal-qari u għamlu aċċessibbli temi kumplessi lil qarrejja żgħar u żgħażagħ. Kollox ma’ kollox, il-livell għoli huwa riżultat tal-passi kbar ’il quddiem li għamlet il-letteratura għat-tfal u ż-żgħażagħ.
Ingħataw ukoll żewġ premji speċjali. Il-Premju għall-Kontribut Siewi fil-Qasam tal-Kotba u l-Letteratura mar għand Giovanni Bonello, filwaqt li l-Premju għall-Aħjar Awtur Emerġenti ħadu Ryan Falzon.
Il-Premju Nazzjonali tal-Ktieb għall-Adulti
Rumanzi bil-Malti u bl-Ingliż
Ma ntgħażlux finalisti
Novelli bil-Malti u bl-Ingliż
Ma ngħatax premju
Poeżiji bil-Malti u bl-Ingliż
Għażiż Ġismi ta’ Immanuel Mifsud (Klabb Kotba Maltin)
Drama
Ma kienx hemm sottomissjonijiet
Traduzzjoni
Il-Frammenti ta’ Saffo (Saffo) tradott minn Warren Bartolo (Ede Books)
Letteratura mhux Fittizja bil-Malti u bl-Ingliż
Fejjaqtni Int: Rużar Briffa – u Jien ta’ Paul P. Borg (Awtoppubblikat)
Riċerka
Vincenzo Bonello: His Legacy in Heritage editjat minn Theresa Vella (Kite Group)
Riċerka Storjografika
Jacques François de Chambray: The Order He Served, the Island He Loved, and the Fort He Built ta’ Joseph Scicluna (Kite Group)
Premju għall-Aħjar Produzzjoni ta’ Ktieb bl-Isbaħ Dehra
Ede Books għall-ktieb Il-Frammenti ta’ Saffo (Saffo) tradott minn Warren Bartolo
Premju għall-Kontribut Siewi fil-Qasam tal-Kotba u l-Letteratura
Giovanni Bonello
Premju għall-Aħjar Awtur Emerġenti
Ryan Falzon
Il-Premju Terramaxka għat-Tfal u ż-Żgħażagħ 2024
Kotba għat-Tfal (etajiet 0-7)
Madame Ortensja Paskwalina De Rohan ta’ Clare Azzopardi, illustrat minn Moira Scicluna Zahra (Merlin Publishers)
Kotba għat-Tfal (etajiet 8-12)
Il-Każ tal-Kappell Ikkalibrat ta’ Leanne Ellul, illustrat minn Marisa Attard (Merlin Publishers)
Letteratura għaż-Żgħażagħ
Iż-Żmien Kurjuż taż-Żgħożija editjat minn Clare Azzopardi u Glen Calleja (Aġenzija Żgħażagħ)
Kotba maqlubin għall-Malti (etajiet 0-7)
Iddeverti Kemm Tiflaħ, Binti! (Mandy Archer; Shane Crampton ill.) tradott minn Janet Mallia (BDL Publishing)
Kotba maqlubin għall-Malti (etajiet 8-12)
Maskra Ħamra: Sensiela Kif Issir Supereroj 2 (Elias Våhlund; Agnes Våhlund ill.) tradott minn Antoinette Borg (Merlin Publishers)
Letteratura għaż-Żgħażagħ Tradotta
Fake ta’ Veru (Nereida Carrillo; Alberto Montt ill.) tradott minn David Aloisio (Merlin Publishers)
Premju għall-Aħjar Produzzjoni ta’ Ktieb bl-Isbaħ Dehra
Merlin Publishers għall-ktieb M għal Malta ta’ Naomi Gatt
