Il-Qorti ċaħdet talba ta’ Manuel Delia biex terġa’ tikkunsidra projbizzjoni ġenerali fuq diskussjonijiet pubbliċi dwar il-qtil ta’ Daphne Caruana Galizia u Yorgen Fenech, wieħed mill-persuna akkużati bil-qtil tagħha. Il-ġimgħa l-oħra, l-Imħallef Edwina Grima ordnat lis-sit NEWZ.mt biex iniżżel videoblog ta’ Manuel Delia mill-paġna tiegħu ta’ Facebook.
Tul il-filmat, Delia ddiskuta kontroversja preċedenti li fiha l-istess imħallef kienet ordnat lil Lovin Malta biex tneħħi partijiet minn intervista mal-avukat Jason Azzopardi, li sostna li Fenech kien l-uniku moħħ fil-qtil ta’ Daphne Caruana Galizia.
Dan kien wassal lill-Imħallef Grima biex toħroġ projbizzjoni fuq “kitbiet, stampati jew le, u dikjarazzjonijiet jew diskussjonijiet pubbliċi fuq il-midja stampata, televiżiva u fuq ir-radju u l-midja soċjali kollha, dwar id-delitt u l-persuna akkużata bir-reat,” sakemm jiġu konklużi l-proċeduri.
Taħt dan id-digriet, huma permessi biss rapporti dwar il-proċeduri tal-Qorti, u kull min jinstab ħati li kiser l-ordni jinstab f’disprezz tal-Qorti. It-Tlieta, Delia kien talab lill-Qorti Kriminali biex terġa’ tikkunsidra din il-projbizzjoni, u sostna li l-projbizzjoni imposta fuq ir-rappurtaġġ tal-attentat bla suċċess ta’ Fenech li jikseb maħfra Presidenzjali, kienet wiesgħa wisq, bla bżonn f’pajjiż demokratiku u kisret id-dritt tal-libertà tal-espressjoni.
L-Erbgħa, din it-talba ġiet miċħuda mill-Qorti.
