Daniel Borg, mill-Gozo Business Chamber, tkellem dwar kif ilkoll kemm aħna għandna bżonn nagħmlu eżami tal-kuxjenza dwar il-mod ta’ kif qed jiżviluppa Għawdex.
“Filwaqt li Għawdex qed ikompli jiżviluppa, dan l-iżvilupp għandu jsir b’mod iktar sostenibbli,” sostna Daniel Borg.
Daniel Borg irrimarka li l-Għawdxin għandhom ikunu huma li jiddeċedu l-prijoritajiet tagħhom, għall-Għawdex aħjar.
Madankollu, Borg insista li ma rridux ninsew l-isfidi li qegħdin itaqqlu lill-Għawdxin. Il-Gozo Business Chamber ilhom xhur sħaħ jitkellmu dwar il-port tal-Imġarr li fil-fehma tagħhom hu zgħir wisq u qed ibati minn ħafna nuqqasijiet kaġun tal-fatt li s-servizzi kollha qed joperaw mill-istess post. Apparti minn hekk, intqal ukoll li hemm bżonn flotta ġdida ta’ vapuri hekk kif il-vapur second hand Nikolaus għandu ħafna nuqqasijiet – speċjalment b’rabta ma’ aċċessibbiltà.
“Huwa dmir tagħna lkoll li nħarsu fit-tul u Għawdex inpoġġuħ fiċ-ċentru. Hemm bżonn li nqumu fuq saqajna u nieħdu ħsiebu kif jixraqlu u ngħadduh lil ta’ warajna bl-aħjar mod possibbli.”
