Il-Qorti preseduta mill-Imħallef Audrey Demicoli ċaħdet it-talba ta’ Yorgen Fenech li d-dritt tiegħu għal smigħ ġust inkiser minħabba n-nuqqas ta’ żvelar tal-provi kollha mill-prosekuzzjoni, u kkonkludiet li t-talba kienet waħda prematura. Is-sentenza ngħatat il-Ġimgħa f’kawża mressqa fl-2021 min-negozjant li bħalissa qed jistenna li jgħaddi ġuri bħala allegat kompliċi fil-qtil ta’ Daphne Caruana Galizia f’Ottubru 2017.
Sa mill-arrest tiegħu f’Novembru 2019, Fenech ressaq bosta talbiet biex il-materjal kollu miġbur mill-investigaturi dwar il-qtil ikun disponibbli għalih f’termini tad-dritt tal-akkużat għal żvelar sħiħ fuq il-każ. Il-Maġistrat Rachel Montebello li ppresiediet il-kumpilazzjoni tal-provi kienet iddegretat ukoll li l-pulizija kellha tiżvela informazzjoni li għandha f’idejha sabiex l-avukati ta’ Fenech ikunu jistgħu jistabbilixxu difiża effettiva.
Meta tat is-sentenza, il-Prim’Awla, il-Prim Awla tal-Qorti Ċivili fil-ġurisdizzjoni kostituzzjonali tagħha laqgħet it-talbiet tal-Avukat tal-Istat u l-Kummissarju tal-Pulizija, bħala intimati, fis-sens li t-talba ta’ Fenech kienet prematura peress li l-proċeduri kriminali kontrih kienu għadhom għaddejjin.
Għalkemm dawk il-proċeduri kienu għaddew mill-istadju ta’ mottivi preliminari għall-proċess, li ġew deċiżi anke fl-appell, Fenech xorta kellu ċ-“ċans u l-possibbiltà” li jagħmel it-talba tiegħu fil-“forum xieraq”.
Huwa seta’ jitlob li jixhdu xhieda u li jiġu esebiti provi materjali oħra jekk iqis li dawn huma rilevanti għall-każ tiegħu. Barra minn hekk, bis-saħħa tal-ġurisprudenza dwar il-kwistjoni, anki jekk dawk il-proċedimenti kriminali jkunu waslu fi stadju aktar avvanzat, tali ilment dwar id-dritt tal-akkużat għal smigħ xieraq, xorta jkun meqjus prematur.
U dan għaliex Fenech kellu rimedji proċedurali oħra għad-dispożizzjoni, qalet l-Imħallef Audrey Demicoli. Dan aktar u aktar fid-dawl tal-fatt li l-kumpilazzjoni tal-qtil minn dak iż-żmien kienet reġgħet infetħet u kienu qed jissejħu xhieda ġodda.
Fenech kellu l-fakultà u d-dritt li jitlob l-iżvelar sħiħ tal-provi li kien iqis bħala “imperattiv” għad-difiża tiegħu u li jistaqsi u jeżamina kontra x-xhieda waqt il-proċess. Filwaqt li ddikjarat li kienet qed tastjeni milli tieħu konjizzjoni tat-talbiet tar-rikorrent, il-qorti tħeġġu biex “jieħu vantaġġ mir-rimedji pprovduti mil-liġi f’dan l-istadju tal-proċeduri kriminali”. Għal Fenech qed jidhru l-Avukati Charles Mercieca, Gianluca Caruana Curran u Marion Camilleri.
