Il-Qorti tal-Appell Kriminali kkonfermat sentenza fil-konfront ta’ żagħżugħ ta’ 27 sena minn San Ġwann li f’Lulju li għadda kien intbagħat 18-il xahar ħabs talli wettaq aggressjoni ħarxa li fiha ħalla żagħżugħ, li kien iltaqa’ miegħu fuq pjattaforma popolari ta’ ‘dating gay’, fil-periklu tal-mewt.
Kurt Amato kien ġie mixli li kkaġuna lill-vittma jsofri ġrieħi gravi kif ukoll li wettaq reat ta’ mibegħda motivat mill-orjentazzjoni sesswali tal-vittma. Huwa appella fejn qal li skont hu ma kienx hemm provi b’saħħithom fil-każ u li l-piena ma għandhiex isservi bħala vendikazzjoni tas-soċjetà fil-konfront tiegħu.
Tenna li huwa minnu li fil-passat huwa kien jagħmel użu mid-droga u li warrab dawk in-nies li ppruvaw jigwidawh lejn it-triq it-tajba. Jgħid li minn dak iżżmien huwa dawwar ħajtu u ħallas il-prezz għal dak li għamel. Sostna li piena ta’ priġunerija se xxejjen il-progress li għamel.
Saħaq ukoll li l-piena mogħtija mill-Ewwel Qorti ma tilħaqx ilbilanċ neċessarju bejn l-element riformattiv u dak retributtiv u għalhekk talab lill-Imħallef Neville Camilleri li sema’ l-appell biex jirriforma s-sentenza mogħtija mill-Ewwel Qorti.
Il-każ ġie mressaq għall-attenzjoni tal-Pulizija fil-11 ta’ Jannar 2022 minn tobba fl-Isptar Mater Dei, li rrappurtaw li pazjent kien iddaħħal il-lejl ta’ qabel, f’kundizzjoni kritika u kien fil-periklu li jmut. Fil-bidu, il-vittma kien qal lill-uffiċjali li dakinhar filgħaxija kien tfixkel maċ-ċinga ta’ kelb waqt li kien miexi fi Triq Ġorġ Borġ Olivier, f’Tas-Sliema, iżda aktar tard stqarr li vvinta dik l-istorja minħabba l-biża’ li jgħid lil ommu dwar l-orjentazzjoni sesswali tiegħu.
“Il-verżjoni vera hi li kont sejjer id-dar wara li ħadt kafè ma’ ħabib tiegħi. Inżilt Triq Oliver Borg, faċċata tal-isptar. Smajt ismi jissejjaħ, dawwart wiċċi u kien Kurt, li ġera lejja u beda jagħtini bis-sieq u jimbottani lejn l-art.
“Wara li xi ħadd waqqaf l-attakk, irnexxieli nimxi sad-dar, kont naħseb li kien l-uġigħ tal-artrite tiegħi, imbagħad stajt nisma’ xi ħaġa fl-intern tiegħi, għalhekk ċempilt lil ommi, u tlabtha biex teħodni l-isptar. Meta wasalt l-isptar ħaduni mill-ewwel għal operazzjoni.
“Qomt fis-sala tal-operazzjonijiet, u ma ngħatajtx aħbar tajba. Għidt lill-pulizija għall-ewwel li żlaqt bil-kelb tiegħi għax bżajt minn dak li ġara.” Fix-xhieda tiegħu, il-vittma qal li kien jaf lil Amato “permezz ta’ kollega ta’ ħabib ta’ ħabib tiegħi” u li kien ġie aggredit minnu qabel waqt li kien qed jagħti lift lil Amato, iżda ma kienx irrapporta.
Ir-raġel fakkar li kien iltaqa’ ma’ Amato fuq ‘Grindr’, li hija dating app għall-komunità LGBTIQ+, u kien staqsieh dwar il-preżenza tiegħu fuq il-pjattaforma, peress li kien taħt l-impressjoni li Amato ma kienx ‘gay’.
“Saqsejtu għaliex kien fuqha għax kien straight. U qalli li kien kurjuż… imbagħad wara madwar ħames minuti imblokkani, l-ewwel qalli biex ma ngħid lil ħadd dwaru, imbagħad imblokkani u mbagħad madwar sagħtejn wara daħal fuq Facebook u qalli, “Trid niltaqgħu?” u għedtlu le.”
Amato kien aggredixxa lill-vittma f’Tas-Sliema waqt li dan tal-aħħar kien sejjer id-dar wara li mar f’ħanut tal-kafè ma’ ħabib. Fil-Qorti ntqal li l-imputat kien ġera lejh, imbagħad tah daqqa ta’ sieq kemm-il darba, qabel imbotta lir-raġel mal-art u kompla jagħtih bis-sieq sakemm intervjena xi ħadd li kien għaddej u waqqfu.
Tabib li kien ikkura lill-vittma l-isptar qal lill-Qorti li l-ġrieħi, li kienu jinkludu ġrieħi serji f’wiċċu u fil-fwied tiegħu, kienu ta’ theddida għall-ħajja u kellu jiġi operat immedjatament. Wieħed mix-xhieda tad-difiża kien ħabib ‘gay’ u li kien jgħix ma’ Amato, li insista li l-akkużat ma kienx omofobiku.
Wara li evalwa l-provi, il-Maġistrat Victor Axiak sab lil Amato ħati ta’ ġrieħi gravi, iżda ma kkundannahx li wettaq reat ta’ mibegħda, minħabba nuqqas ta’ provi. Il-Maġistrat osserva li l-motiv apparenti wara l-attakk kien il-biża’ ta’ Amato ta’ imbarazzament pubbliku u kienu l-vittma li jiżvelaw il-preżenza ta’ Amato fuq Grindr, aktar milli xi ostilità partikolari lejn l-orjentazzjoni sesswali tal-vittma.
Amato kien ikkundannat 18-il xahar ħabs, bil-Qorti tqis il-fatt li Amato diġà kellu kundanni preċedenti għal serq vjolenti u ksur ta’ ordnijiet ta’ probation. Inħarġet ukoll ordni ta’ trażżin ta’ tliet snin biex tipproteġi lill-vittma wara li Amato joħroġ mill-ħabs.
Il-Qorti tal-Appell qablet ma’ din is-sentenza u qalet li minkejja li l-appellant jargumenta li huwa
dawwar ħajtu u ħallas il-prezz għal dak li għamel u li piena ta’ priġunerija sejra xxejjen il-progress li għamel pero’ fl-istess waqt ma jistax jiġi njorat dak li ngħad minn mill-Ewwel Qorti fejn kienet ġustifikata tagħti tali piena.
Il-Qorti tal-Appell qalet li hija tal-fehma li ma hemmx lok għal ċaqlieq fir-rigward tal-piena mogħtija mill-Ewwel Qorti fil-konfront tal-appellant allura imputat u għaldaqstant l-appell qed jiġi miċħud. L-Ispettur Colin Sheldon mexxa l-prosekuzzjoni, bl-avukat Alfred Abela jidher għall-akkużat. L-Avukat Wilfred Buttigieg assista lill-vittma bħala parte civile.
