Il-poplu fl-Albanija qed iżid il-protesti ħorox kontra l-Partit Soċjalista fil-Gvern immexxi mill-Prim Ministru Edi Rama….Dan ukoll meta diversi gruppi soċjali qalu li mhumiex lesti li jgħixu fi stat ta’ apatija f’sitwazzjoni fejn il-pajjiż qed jinħakem minn ‘klikka ta’ kriminali’.
L-Oppożizzjoni Albaniża qed takkuża lill-Gvern Soċjalista dwar korruzzjoni, manipulazzjoni tal-elettorat flimkien mas-‘serqa tal-poteri’ lill-ġudikatura tal-pajjiż. Fl-istess ħin, saret referenza għal azzjonijiet oħrajn min-naħa tal-Gvern intiżi biex iservu l-interessi tal-ftit għall-iskaptu tal-poplu.
Eluf ta’ dimostranti, fil-bidu tal-ġimgħa, inġabru barra l-bini ewlieni tal-Gvern f’Tirana fejn fost oħrajn għajtu messaġġi kontra ‘id-dittatorjat li ġab gwaj lil pajjiżu’. U s-sitwazzjoni fil-kapitali, sigħat ilu, qalbet għall-agħar meta s-sostenituri tal-Oppożizzjoni iġġieldu mal-pulizija fost it-tfigħ tal-bombi molotov.
Kien hemm anki l-gruppi ta’ dimostranti li nġabru barra l-kwartieri-ġenerali tal-Partit Soċjalista u fejn twaddbu aktar ‘molotovs’ — bin-nies jaħarqu r-ritratti ta’ Edi Rama u bil-ġlied mal-pulizija jkompli anki barra l-bini tal-Ministeru għall-Intern u l-bini muniċipali f’Tirana.
Il-Pulizija rreaġiet bil-gass tad-dmugħ waqt li l-mijiet tal-uffiċjali għaz-zamma tal-liġi skjeraw ruħhom fid-diversi zoni tal-kapitali biex jipproteġu lill-istituzzjonijiet tal-Gvern – u sakemm il-folol tferrxu mill-inħawi. Ir-rapporti qalu li f’dawn l-inċidenti weġġgħu numru mhux stabbilit ta’ dimostranti u membri tal-korp tal-pulizija.
Fil-fatt, diversi dimostranti kellhom jittieħdu l-isptar isofru mill-ġrieħi u l-effetti tal-gass, bis-Segretarju-Ġenerali tal-Partit Demokatiku, Flamur Noka, iwiegħed li l-kampanja ta’ diżubbidjenza ċivili għandha tkompli ‘kontra Gvern li qed iżomm lill-pajjiż bħala ostaġġ.’
Iridu Gvern teknokratiku mkinflok is-Soċjalisti
L-għajta fost il-maġġoranza tal-Albaniżi hi biex il-Gvern Soċjalista jċedi postu lil kabinett teknokratiku qabel l-elezzjonijiet parlamentari tas-sena d-dieħla fl-Albanija
U s-sitwazzjoni għall-Albanija saret aktar ikkumplikata meta l-Gvern ta’ Rama, aktar ‘il quddiem fix-xahar, irid jibda t-taħditiet mal-Unjoni Ewropea dwar kif l-Albanija tista’ titmexxa aħjar skont il-kriterji tal-Unjoni relatati mal-amministrazzjoni tal-liġi.
Fl-istess ħin, l-Albanija tinsab taħt pressjoni kbira biex taċċerta mill-funzjoni tal-istituzzjonijiet demokratiċi u biex tirranka l-ġlieda kontra l-korruzzjoni fost l-ogħla livelli tat-tmexxija kif ukoll f’setturi oħra tal-pajjiż.
Il-Partit Demokratiku tal-eks Prim Ministru Albaniż, Sali Berisha, ilu l-aħħar ġimgħa jorganizza l-protesti barra l-bini tal-Parlament f’Tirana. Dan wara li membru tal-partit ta’ Berisha spiċċa l-ħabs fost akkużi li hu indirizza ‘il-kalunji’ fil-konfront ta’ xi membri tal-Gvern u bl-Oppożizzjoni qed tinsisti li dan ir-raġel spiċċa vittma ta’ ‘kumplott politiku’ min-naħa tas-Soċjalisti.
L-Istati Uniti u l-Unjoni Ewropea issa ħeġġew biex l-Oppożizzjoni Albaniża tidħol mill-ġdid fi djalogu mal-Gvern ta’ Rama – u fost it-twissija li l-vjolenza mhix se tgħin biex l-Albanija tintegra ruħha fi ħdan l-Unjoni ta’ 27 pajjiż-membru.
Min-naħa tagħhom, id-Demokratiċi qed jgħidu li s-Soċjalisti fil-Gvern ma jridux jafu bi djalogu serju, huma u jinsistu biex il-Kap, Sali Berisha, jinħeles minn sitwazzjoni ta’ arrest fejn sallum għadu projbit milli joħroġ minn daru. Huma qed jgħidu li Berisha wkoll spiċċa ‘ostaġġ ta’ kampanja qarrieqa’ wara li hu kien ikkundannat għall-arrest waqt investigazzjoni dwar allegata korruzzjoni mmexxija mill-Gvern.
