Ħaddiema tal-Protezzjoni Ċivili ssejħu f’San Pawl il-Baħar biex ineħħu periklu wara li ċediet parti minn gallarija ta’ appartament.
Skont kelliema għall-Pulizija, jirriżulta li kienet ċediet ix-xibka ta’ din il-gallarija, b’konsegwenza li parti mill-gallarija waqgħet fuq vettura li kienet ipparkjata.
L-inċident seħħ għall-ħabta tas-7:30pm tal-Ħadd filgħaxija, fi Triq Luigi Preziosi, f’San Pawl il-Baħar.
Jidher li ma weġġa’ ħadd f’dan l-inċident.
Fil-post issejjaħ ukoll perit tal-Gvern, filwaqt li tpoġġew barriers bħala prekwazjoni. Ġew ukoll ikkuntattjati s-sidien ta’ din il-proprjetà.
