Il-Gvern għadu ma jistax jikkonferma meta se jkun qed jiftaħ il-hub ta’ Raħal Ġdid, minkejja li dan il-Paola Southern Regional Hub kellu jiftaħ sentejn ilu.
Net News staqsa lis-Segretarju Parlamentari Malcolm Paul Agius Galea jekk jafx meta se jkun qed jiftaħ dan il-hub. Bid-deputat Laburista jgħid li bħalissa għaddejja ħidma sfieqa – iżda timeline ċar għad mhemmx.
Apparti minn hekk, hu insista li l-media ma tridx tagħti impressjoni ħażina.
Agius Galea semma’ li kien hemm kwistjoni mal-kuntraturi; liema kwistjoni tista’ twassal biex il-Gvern jitlef 50 miljun ewro minħabba li jilħaq jiskadi ż-żmien stipulat mill-UE biex dan l-isptar jibda jopera.
U minkejja li s-Segretarju Parlamentari qalilna li hemm ħidma għaddeja biex dawn il-flus ma jintilfux, fl-ebda ħin ma ta’ garanzija li l-Gvern se jirnexxielu.
Intant, lis-Segretarju Parlamentari staqsejnih ukoll dwar il-ħub tat-tramunatana, li suppost kellu jtaffi mid-domanda għas-servizzi fuq Mater Dei; ċentru li issa skont il-Prim Ministru Robert Abela m’għadux prijorita.
U minkejja li diversi persuni li tkellmu ma’ Net News spjegaw li huma ġew infurmati li għandhom imorru għall-kura f’Għawdex hekk kif il-hub tat-tramuntana ma nfetahx Agius Galea qal biss illi hu jifhem li qed ikun hemm xi skariġi.
