Brażiljana ta’ 22 sena li ġiet arrestata fl-Ajruport Internazzjonali ta’ Malta wara li nqabdet timporta valur ta’ €130,000 kokaina ġewwa żaqqha wieġbet mhux ħatja fil-Qorti t-Tlieta. Il-Qorti semgħet kif Tainara Dernandes Da Silva nqabdet ġġorr 66 kapsula kokaina fl-istonku u fil-parti ġenitali tagħha waqt li kienet qed tivvjaġġa fuq titjira minn Barċellona għal Malta nhar il-Ħadd.
Waqt seduta ppreseduta mill-Maġistrat Noel Bartolo, il-Qorti semgħet kif uffiċjali tal-pulizija kienu qed jagħmlu spezzjonijiet fuq passiġġieri fuq it-titjira. Innutaw lill-mara taġixxi b’mod suspettuż, u malli nnotat il-preżenza tal-pulizija, ippruvat taħrab iżda mill-ewwel inqabdet.
Saru testijiet tal-Xrays u ġie żvelat li Da Silva kellha droga moħbija ġewwa ġisimha. Hija ttieħdet l-Isptar Mater Dei, fejn irriżulta li kellha fuqha madwar kilo sustanza suspettata li hija kokaina, b’valur fit-triq ta’ kważi €130,000.
Da Silva wieġbet mhux ħatja tal-akkużi miġjuba kontriha, u l-avukat tagħha ma talabx il-ħelsien mill-arrest. Hija nżammet taħt arrest preventiv. Il-prosekuzzjoni tmexxiet mill-Ispettur Jonathan Pace flimkien mal-Avukat Nadia Ciappara f’isem l-Avukat Ġenerali.
