L-awtur u l-ġurnalist Mark Camilleri ġie akkużat b’disprezz lejn il-qorti fuq il-pubblikazzjoni taċ-chats ta’ WhatsApp, madankollu, il-każ ġie differit għal Ottubru 2025 hekk kif Camilleri ressaq każ kostituzzjonali dwar il-kwistjoni.
Camilleri tressaq quddiem il-maġistrat Astrid May Grima. Qabel ma bdiet it-taħrika taħt ċitazzjoni, l-avukat tiegħu, David Bonello, informa lill-Qorti li l-klijent tiegħu kellu kawża kostituzzjonali għaddejja. Dr. Bonello ddetta nota li fiha stqarr li kawża kostituzzjonali li hija direttament relatata mal-każ ġiet ippreżentata fl-10 ta’ Awwissu 2023.
Fir-rikors tiegħu, Camilleri talab lill-qorti tiddikjara li l-pubblikazzjoni fuq WhatsApp kienet fl-interess pubbliku. Permezz tal-avukati tiegħu, Camilleri talab ukoll lill-Qorti Kostituzzjonali biex tiddikjara li d-drittijiet fundamentali tiegħu għal-libertà tal-espressjoni u d-dritt għal smigħ ġust kienu nkisru mill-Qorti Kriminali meta ordnat azzjoni kontrih, fost talbiet oħra.
L-Avukat Bonello informa lill-qorti wkoll li l-kawża kostituzzjonali tinsab fi stadju fejn l-intimati jeħtieġ li jippreżentaw ix-xhieda tagħhom, jiġifieri li Camilleri diġà ressaq ix-xhieda tiegħu f’dawk il-proċeduri separati.
Il-każ, li se jkompli f’Jannar, se jkollu impatt dirett fuq il-proċeduri kriminali kontra Camilleri, saħaq Dr. Bonello hekk kif talab lill-Qorti biex dawn il-proċeduri jiġu posposti għal data aktar tard. L-ispettur Christine Delia qalet li ma kienx hemm oġġezzjoni minn naħa tagħhom, u spjegat li l-pulizija kienu qed isegwu ordni tal-Qorti maħruġa mill-Qorti Kriminali.
Hija ddettat ukoll nota li fiha infurmat lill-Qorti li ngħatat struzzjonijiet biex tinvestiga lil Mark Camilleri dwar il-pubblikazzjoni ta’ chats ta’ WhatsApp li spiċċaw ‘leaked’.’ Il-Qorti Kriminali, ippreseduta mill-Imħallef Edwina Grima, ordnat lill-pulizija tieħu passi fil-konfront tal-ġurnalista, li qieset li kiser ordni tal-qorti li tipprojbixxi l-pubblikazzjoni ta’ kull materjal misjub fl-atti tal-kawża kriminali kontra s-suspettat Yorgen Fenech mixli li kien involut fil-qtil tal-ġurnalista Daphne Caruana Galizia.
Wara li semgħet is-sottomissjonijiet, il-qorti differiet is-seduta għal aktar informazzjoni għal Ottubru 2025. L-Avukat- David Bonello u Joseph Mizzi assistew lil Camilleri.
