Raġel ġie meħlus minn piena massima ta’ 12-il sena ħabs talli allegatament stupra lill-eks sieħba tiegħu wara li l-mara insistiet li twaqqa’ l-akkużi, u qalet li din kienet id-deċiżjoni ħielsa tagħha. Ir-raġel mill-Ħamrun ta’ 38 sena, kien tressaq il-Qorti fl-14 ta’ Ottubru wara li l-mara ressqet rapport ta’ vjolenza domestika fejn sostniet li rċeviet messaġġi ta’ theddid mingħand l-eks sieħeb tagħha.
Waqt il-valutazzjoni tar-riskju tal-każ, l-allegata vittma qalet lill-psikologi li r-raġel kien stupraha wkoll. Ir-rapport tagħha wassal għal inkjesta maġisterjali. Ir-raġel kien akkużat bi stupru, atti sesswali mhux kunsenswali, li żamm lill-allegata vittma kontra l-volontà tagħha kif ukoll li uża ħażin tagħmir ta’ komunikazzjoni elettronika u ħsarat lil proprjetà ta’ terzi.
Huwa kien akkużat ukoll li sar reċediv. Huwa wieġeb mhux ħati. L-imputat ingħata l-libertà proviżorja wara li l-avukat difensur Franco Debono sostna li s-sess jidher li kien kunsenswali. Huwa warrab ukoll bil-qawwa l-argument tal-prosekuzzjoni li kien hemm biża’ reali ta’ tbagħbis tal-evidenza.
Peress li l-allegata vittma kienet diġà xehdet quddiem il-maġistrat inkwerenti, f’dak li għandu x’jaqsam mal-Kodiċi Kriminali dan kien ifisser li ma kellhiex tiġi mħarrka biex terġa’ tixhed fil-kumpilazzjoni tal-provi, sostna Dr. Debono.
Meta l-każ reġa’ beda, l-avukati tal-parte civile Mario Mifsud u Nicholas Mifsud infurmaw lill-Qorti li l-mara ma xtaqitx tixhed. Riedet twaqqa’ l-akkużi u twaqqaf il-proċeduri kriminali kontra l-imputat. Dik it-talba kellha tiġi milqugħa mill-Qorti sakemm tkun deċiżjoni volontarja mill-allegata vittma, qalet id-difiża.
L-allegata vittma ngħatat il-ġurament. Imbagħad ġiet interrogata mill-prosekuzzjoni, mill-avukati tagħha kif ukoll mill-Maġistrat Abigail Critien sabiex jiġi żgurat li ma ġietx ippressata bl-ebda mod. Iżda l-mara baqgħet soda fil-pożizzjoni tagħha. Saħqet darbtejn li riedet twaqqa’ l-akkużi, u spjegat li xtaqet tirranġa l-affarijiet u tkompli r-relazzjoni tagħha miegħu.
Il-Maġistrat wissietha li kieku t-talba tagħha kellha tintlaqa’, ma setgħet tistenna l-ebda protezzjoni mill-Qorti. Iżda l-pożizzjoni tal-mara ma nbidlitx. Hija rrifjutat ukoll suġġeriment biex deċiżjoni finali tiġi posposta għal seduta oħra.
“Ħadd ma sfurzani nieħu din id-deċiżjoni. Kienet ir-rieda ħielsa tiegħi”, qalet il-mara. Quddiem dik ix-xhieda, il-Qorti laqgħet it-talba tal-mara biex tissospendi l-proċeduri kontra l-imputat li b’hekk ġie meħlus minn aktar prosekuzzjoni kriminali.
L-avukat tal-AĠ Jurgen Dalli u l-Ispettur Colin Sheldon mexxew il-prosekuzzjoni. L-avukati Franco Debono u Adreana Zammit kienu l-avukati difensuri. L-avukati Mario Mifsud u Nicholas Mifsud dehru bħala parte civile fil-każ.
