L-Istilla Għawdxija Maria Farrugia kompliet il-karriera impekkabbli tagħha barra minn xtutna hekk kif xahar biss wara li ffirmat ma’ Sheffield United, li bħalissa qed jilagħbu fil-FA Women’s Championship, rebħet żewġ unuri importanti.
Farrugia rebħet il-Barclays Women’s Championship Player għax-xahar ta’ Ottubru, kif ukoll rebħet l-unur tal-isbaħ gowl għall-istess xahar.
Farrugia għamlet id-debutt tagħha ma’ Sheffield f’Settembru, fejn s’issa lagħbet għaxar partiti u sabet ix-xibka 5 darbiet, bi tnejn minn dawk il-gowls jaslu kontra Blackburn Rovers fejn eventwalment il-Blades rebħu l-ewwel partita staġjonali permezz tal-kontribut ta’ Farrugia.
L-attakkanta ta’ 23 sena mhux biss tkompli tirnexxi l-Ingilterra, iżda anke tkompli tkabbar isimha fix-xena internazzjonali hekk kif sabet ix-xibka kontra l-Portugall u l-Bosnja u Herzegovina mat-tim Nazzjonali Malti f’League B tal-kwalifiakzzjoni għall-EURO.
Din mhijiex l-ewwel esperjenza ta’ Farrugia barra minn xtutna hekk kif wara li ggradwat mill-Iskola Nazzjonali tal-Isport f’Malta, hija ngħaqdet mal-akkademija Foundation of Light, waħda mill-ikbar akademiji fl-Ingilterra, immexija minn Sunderland AFC.
Fl-2019 hija għamlet id-debutt professjonali tagħha ma’ Sunderland f’partita kontra Blackburn. Farrugia damet mal-Black Cats sal-2022 fejn lagħbet 56 partita u skorjat 17-il gowl.
Fiż-żmien tagħha ma’ Sunderland, hi ġiet rikonoxxuta bħala waħda mill-aqwa plejers tal-kampjoant fl-istaġun 2021-22, fejn anke ġiet imsejħa fost l-aqwa plejers tal-ġimgħa għall-ewwel ġimgħa.
Wara l-esperjenza tagħha ma’ Sunderland, Farrugia ngħaqdet ma’ Durham għal staġun wieħed fejn hemm għamlet total ta’ 27 preżenza.
Fl-aħħar tal-istaġun 2022-23, Farrugua ffirmat kuntratt ma’ Lewes FC Women, fejn anke hemm kellha suċċess kbir, fejn saħansitra rebħet l-unur tal-isbaħ gowl tax-xahar għal Jannar, kif ukoll rebħet l-unur tal-aqwa plejer tax-xahar għal Marzu. F’dak l-istaġun hi skorjat tliet gowls, tnejn minn dawn il-gowls jaslu kontra t-tim kurrenti tagħha Sheffield United. Hi rreġistrat żewġ assists ukoll f’dak l-istaġun
Kien fid-19 ta’ Awwissu tal-2024 li għamlet l-aħħar transferiment u saret parti mit-tim ta’ Sheffield United.
