Żewġ sorijiet li għexieren ta’ snin ilu allegatament abbużaw minn diversi tfal li kellhom jixhdu quddiem l-Imħallef Mark Simiana, naqsu milli jattendu l-Qorti biex jagħtu x-xhieda tagħhom minħabba appuntamenti mediċi. Għaldaqstant ġie deċiż li dawn jixhdu online fis-27 ta’ Jannar li ġej.
Dan ħareġ meta quddiem l-Imħallef Mark Simiana, kompliet il-kawża kostituzzjonali kontra l-istat, li fetħu l-allegat vittmi ta’ abbuż f’Lourdes Home, f’Għajnsielem, Għawdex. Is-sorijiet Josephine Anne Sultana u Dorothy Mizzi li għandhom ‘ fuq minn 80 sena, kellhom jagħtu x-xhieda tagħhom it-Tnejn waranofsinhar. B’rabta ma’ dan il-każ, is-soru Carmelita Borg kienet ukoll qed tiġi implikata b’rabta ma’ dan l-abbuż. Din is-soru, iżda, mietet aktar kmieni din is-sena.
Il-kawża kostituzzjonali li kienu ppreżentaw il-vittmi saret kontra l-Avukat tal-Istat minħabba li skont huma, l-Istat naqas li jipproteġihom minn dan l-allegat abbuż li jmur lura għas-snin tmenin. Il-Pulizija kienet iddikjarat li ma tistax takkużahom peress li l-każ huwa preskritt. Is-sorijiet għadhom joperaw liberament fi ħdan istituzzjonijiet proprjetà tas-sorijiet Dumnikani, minkejja l-lista twila ta’ allegazzjonijiet serji li jiffaċċjaw.
F’Lulju 2022, il-vittmi tal-abbuż iltaqgħu mal-Kummissjoni għas-Salvagwardja tad-Djoċesi ta’ Għawdex, li wassal biex jiġi ppreżentat rapport tal-Pulizija. Ftit ġimgħat wara, il-vittmi ssejħu għal laqgħa mal-Ispettur tal-Pulizija Kylie Borg. Iżda minkejja l-laqgħa, il-Pulizija kienet qalet li ma tista’ tieħu l-ebda azzjoni legali kontra dawk involuti għax għadda wisq żmien.
Fil-Qorti, l-allegati vittmi li fetħu l-każ li huma żewġ nisa u li kienu jgħixu f’Lourdes Home, qed jgħidu li kienu qed jiġu abbużati minn xi sorijiet, b’waħda minnhom kienet tkun wara l-bieb lesta bl-injama f’idha u jekk xi tifla kien ikollha l-uniformi maħmuġa, kienet taqla’ d-daqqiet.
Mix-xhieda sa issa rriżulta li b’kollox kienu 50 tifel u tifla, u kien hemm żewġ sorijiet ma’ kull grupp. Bit-tfal ikollhom timetable stretta, li kienet tinkludi kull tip ta’ tindif, fejn kien isir swat għall-ebda raġuni ta’ xejn. Waħda mill-vittmi sa qalet lill-Pulizija li kienet ġiet imsakkra f’kamra għal tlett ijiem meta kellha biss 10 snin. Għall-vittmi qed tidher l-avukat Lara Dimitrijevic.
Ir-rakkonti mogħtija mill-vittmi ta’ dan abbuż f’idejn is-sorijiet fl-orfanatrofju tad-Dar ta’ Lourdes, kienu xxukkjaw lil ħafna. Għexieren ta’ snin wara li kienu soġġetti għal abbuż fit-tfal, il-vittmi baqgħu trawmatizzati anke issa li waslu fl-età adulta tagħhom. L-abbuż kien ivarja minn abbuż sesswali minn idejn il-kleru, swat fiżiku fuq tfal ta’ età żgħira ta’ ħames snin, sa nsulti.
Fil-ħin tal-abbuż, Sister Josephine Anne Sultana kienet inkarigata tieħu ħsieb waħda mis-sezzjonijiet tal-orfanatrofju fejn kienu qed jinżammu t-tfal. Hija kienet deskritta bħala “dittatur” minn waħda mill-vittmi. Is-soru allegatament kienet tikkastigahom b’modi umiljanti. Waħda mill-vittmi rrakkontat kif it-tfal żgħar kienu jiġu mġiegħla “jieklu r-remettar tagħhom stess” bħala kastig.
“Ma kontx inħobb niekol meta kont tifla żgħira, u niftakar li l-ikel kien tant ħażin li kont inneħħih. Meta kien jiġri hekk, kienet iġegħelni nerġa’ npoġġi r-remettar fuq il-platt u nerġa’ nieklu,” qalet waħda mill-vittmi f’xhieda preċedenti.
Waħda mill-vittmi li fetħet il-każ fil-Qorti kienet qalet ukoll li dawn il-ħniżrijiet kienu jsiru meta hi kienet għadha tifla ta’ bejn sitta u 16-il sena. Qalet li soru kienet ukoll tesponiha ma’ qassis li kien imur fl-istitut għall-qrar u jesponi l-parti privata tiegħu quddiemha bis-soru tgħidilha li peress li dak iż-żmien ma kellhiex ‘boyfriend’ għandha tkun taf kif għandu jkollha l-feelings mal-irġiel.
Xhud mara li llum għandha 51 sena, qalet li fl-istitut magħha kien hemm ħutha iżda ma kellhiex idea tagħhom għax kellhom kunjom differenti. Qalet li s-soru kienet ġieli kaxkritha 22 tarġa u r-raġuni għalha għadha ma tafhiex sal-lum.
Għall-vittmi qed tidher l-Avukat Lara Dimitrijevic.
