Il-plejer Spanjol tat-tennis, Rafael Nadal deher ferm emozzjonat hekk kif sellem għall-aħħar darba lis-segwaċi tiegħu fi tmiem il-finali tad-Davis Cup li saret f’Malaga.
“Kienu 20 sena ta’ karriera professjonali li matulhom kontu miegħi fiż-żminijiet tajbin u f’dawk ħżiena. U grazzi t’hekk imbuttajtuni biex nibqa’ miexi ‘l quddiem,” qal Nadal lill-folla.
Nadal kien qed jittama għal rebħa finali f’daru stess iżda l-Olandiż, Botic van de Zandschulp, biddel kollox b’rebħa ta’ 6-4 6-4, u l-eliminazzjoni ta’ Spanja fil-kwarti tal-finali ġiet ikkonfermata wara li Van de Zandschulp u Wesley Koolhof għelbu lil Carlos Alcaraz u Marcel Granollers.
Din kienet biss it-tieni telfa ta’ Nadal fit-Tazza Davis fis-singles, bit-telfa l-oħra tiġi fid-debutt tiegħu kontra Jiri Novak tar-Repubblika Ċeka lura fl-2004.
Huwa ġie kklassifikat bħala Nru 1 fid-dinja fis-singles mill-Assoċjazzjoni tal-Professjonisti tat-Tennis għal 209 ġimgħat, u spiċċa bħala Nru 1 ta’ tmiem is-sena ħames darbiet. Nadal rebaħ 22 titlu tal-Grand Slam tal-irġiel singles, inkluż rekord ta’ 14-il titlu tal-Open ta’ Franza.
