Malta hi vvalutata mill-Kummissjoni Ewropea li mhix kompletament konformi mar-rakkomandazzjonijiet fiskali filwaqt li n-nefqa netta hija pproġettata li tkun fi ħdan il-limiti massimi.
Dan irriżulta lbieraħ meta l-Kummissjoni Ewropea ppubblikat l-ewwel Pakkett tal-Ħarifa tas-Semestru Ewropew minn meta r-riforma ambizzjuża u komprensiva tal-qafas il-ġdid ta’ governanza ekonomika tal-UE daħlet fis-seħħ f’April 2024.
Dan mhux qed jelimina gradwalment il-miżuri ta’ appoġġ ta’ emerġenza tal-enerġija sax-xitwa 2024-2025, kif irrakkomandat mill-Kunsill. Il-Proċedura ta’ Defiċit Eċċessiv (EDP, Excessive Deficit Procedure) hija l-hekk imsejħa “fergħa korrettiva” tal-Patt ta’ Stabbiltà u Tkabbir.
Dan il-Pakkett tal-Ħarifa jippreżenta r-rakkomandazzjonijiet tal-Kummissjoni għal perkorsi ta’ nefqa netta pluriennali biex jiġi kkoreġut id-defiċit eċċessiv ta’ Malta li bħalissa hu suġġett għall-EDP.
Fil-każ ta’ Malta, il-perkorsi korrettivi hu bbażat fuq il-perkorsi tan-nefqa netta li stabbilixxa fil-pjanijiet ta’ terminu medju tiegħu. Dan huwa konformi mal-enfasi qawwija fuq iż-żieda nazzjonali tal-impenji fiskali skont il-qafas il-ġdid ta’ governanza ekonomika.
Il-Kunsill u l-Grupp tal-Euro issa ser jiddiskutu l-elementi ppreżentati fil-Pakkett Fiskali tal-Ħarifa tas-Semestru Ewropew.
Ladarba l-pjanijiet ta’ terminu medju jkunu ġew approvati mill-Kunsill, il-Kummissjoni se timmonitorja jekk l-Istati Membri jkunux irrispettaw l-impenji li jinsabu f’dawk il-pjanijiet għall-perjodu kollu kopert mill-pjan. L-Istati Membri se jippreżentaw rapporti ta’ progress annwali biex jiffaċilitaw il-monitoraġġ u l-infurzar effettivi.
Il-Kummissjoni se tippreżenta t-tieni parti tal-Pakkett tal-Ħarifa tas-Semestru Ewropew, inkluż l-Istrateġija Annwali għat-Tkabbir Sostenibbli, ir-rakkomandazzjoni għaz-zona tal-euro, ir-Rapport dwar il-Mekkaniżmu ta’ Twissija u l-proposta għal Rapport Konġunt dwar l-Impjiegi, fil-ġimgħat li ġejjin.
