F’għeluq il-35 sena mill-adozzjoni tal-Konvenzjoni tan-Nazzjonijiet Uniti dwar id-Drittijiet tat-Tfal, l-MEP David Casa ħeġġeġ lill-Unjoni Ewropea biex tintensifika l-isforzi biex tiġġieled il-faqar tat-tfal, hekk kif miljuni ta’ tfal madwar il-kontinent għadhom jgħixu taħt il-linja tal-faqar. Fid-diskors tiegħu fil-Parlament Ewropew, Casa saħaq li filwaqt li sar progress, għad fadal ħafna xi jsir.
“35 sena ilu, il-Konvenzjoni tan-NU poġġiet lit-tfal fiċ-ċentru tal-politika soċjali, iżda llum, miljuni ta’ tfal fl-UE jibqgħu maqbuda fil-faqar,” qal Casa. “Din hija realtà li ma nistgħux ninjoraw.”
L-MEP, membru ilu tal-Kumitat tal-Impjiegi u l-Affarijiet Soċjali u darba serva bħala koordinatur tal-PPE, spjega li l-faqar jista’ jkun ereditarju, u li l-effetti tal-faqar fis-snin bikrin jistgħu jħallu effetti tul il-ħajja.
Casa fakkar ukoll lill-MPE fir-responsabbiltà tal-UE li taġixxi għall-futur taċ-ċittadini l-iżgħar tagħha. “It-tfal ma jistgħux jivvutaw, jipprotestaw, jew ibiddlu ċ-ċirkustanzi tagħhom. Huwa f’idejna li niżguraw kwalità ta’ ħajja aħjar u futur isbaħ għalihom,” stqarr.
Huwa appella għat-tisħiħ ta’ inizjattivi eżistenti bħall-Garanzija tat-Tfal u d-Direttiva dwar il-Bilanċ bejn ix-Xogħol u l-Ħajja, li t-tnejn kienu mmirati biex itejbu l-kwalità tal-ħajja tat-tfal. “Għamilna progress, imma rridu nagħmlu aktar biex id-drittijiet tat-tfal mill-kliem fuq il-karta inbiddlu f’realtà,” temm jgħid Casa.
