Il-kriżi bejn il-Gvern tal-Ġorġja u l-Unjoni Ewropea qatt ma kienet daqshekk akuta – u wara li l-Amministrazzjoni mmexxija mill-Prim Ministru Ġorġjan Irakli Kobakhidze għamilha ċara li l-proċess lejn l-isħubija ta’ pajjiżu fl-UE tneħħiet minn fuq l-aġenda tal-Gvern sal-aħħar tal-2028.
Intant, komplew id-dimostrazzjonijiet ta’ rabja li attendew għalihom l-eluf tal-Ġorġjani li xlew lill-Gvern dwar ‘tradiment tal-ideali demokratiċi’…. Komplew ukoll l-inċidenti ta’ vjolenza, bil-pulizija fi Tbilisi, il-kapitali Ġorġjana, jużaw il-forza eċċessiva mad-dimostranti ta’ kontra l-Gvern u meta l-ġurnalisti fl-inħawi wkoll spiċċaw imsawwtin mill-qawwiet tal-iiġi.
Irakli Kobakhidze, li qatt ma ħeba l-ammirazzjoni tiegħu għar-Russja u l-President Russu Vladimir Putin, qed jinsisti li l-Ġorġja, ‘il quddiem, għandha tipprova għal sħubija fl-Unjoni…Iżda hu insista, b’ton aggressiv, li ‘il-proċess għandu jkun wieħed dinjituż li jitmexxa skont il-kundizzjonijiet ta’ Tbilisi’.
U waqt li l-uffiċjali fi Brussell qed jakkużaw lill-Gvern Ġorġjan – immexxi mill-Partit għall-Ħolma Ġorġjana – dwar aġir anti-kostituzzjonali, Kobakhidze qed iżid it-tensjoni bil-kundanna konsistenti tiegħu għall-politiċi tal-Ewropa,….Politiċi li, fi kliemu, ‘ma waqfux jinsulentaw lill-Gvern immexxi minnu’.
Min-naħa tagħhom, id-dimostranti fi Tbilisi qed iqisu l-U-turn tal-Gvern tagħhom bħala azzjoni premeditata kontra l-aspirazzjonijiet tal-poplu.
Dan għaliex il-Ġorġja, qabel l-elezzjonijiet parlamentari tax-xahar li għadda ( fejn il-Partit għall-Ħolma Ġorġjana dikjara ruħu rebbieħ), kienet qabdet sew il-proċess lejn l-isħubija…Fil-fatt, it-tragward għall-integrazzjoni Ewropea hu minsuġ fil-Kostituzzjoni tal-Ġorġja.
Fl-aħħar sigħat, il-President tal-Ġorġja, Salome Zourabichvili, insistiet li se tibqa’ taqdi dan ir-rwol sakemm isiru elezzjonijiet Parlamentari ġodda. Zourabichvili, li hi pro-Ewropa, fissret il-Parlament ta’ Kobakhidze bħala “llleġittimu” fost l-allegazzjonijiet ta’ frodi fl-aħħar votazzjoni nazzjonali.
B’hekk, Zourabichvili qed tisfida b’mod apert lill-Parlament fi Tbilisi li qal li għandu jagħżel President ġdid minflokha fl-14 ta’ Diċembru.
Sadanittant, mhumiex magħrufin l-ammonti tal-midruba taħt idejn il-pulizija waqt l-aħħar protesti fi Tbilisi – għalkemm dawn qed ikunu kalkulati ‘ bl-għexieren kbar’…Hemm ukoll l-attivisti u d-dimostranti favur l-UE li, issa, qed jiżvelaw li l-pulizija Ġorġjana heddewhom bil-mewt fost il-vjolenza fil-kapitali.
Il-pulizija mill-ġdid qed jużaw il-gass tad-dmugħ u l-kanuni tal-ilma fuq il-folol tad-dimostranti li waslu viċin il-bini tal-Parlament fi Tbilisi – b’dimostrazzjonijiet oħra ta’ rabja jsiru fl-ibliet ta’ Batumi, Kutaisi u Zugdidi, kif ukoll fir-reġjuni l-oħra tal-Ġorġja.
Il-Ministeru Ġorġjan għall-Intern, qal li ndarbu talanqas 70 pulizija waqt l-iljieli konsekuttivi ta’ ġlied mad-dimostranti.
L-Unjoni Ewropea, sadanittant, qed tosserva bir-reqqa l-iżviluppi allarmanti fil-Ġorġja…Pajjiż li l-Gvern ta’ Kobakhidze irid li jqarrbu aktar l-orbita ta’ Moska.
L-Ambaxxatur tal-UE għall-Ġorġja, Pawel Herczynski, fisser is-sospensjoni tal-proċess lejn l-isħubija tal-pajjiż fl-Unjoni bħala xi ħaġa ta’ swied il-qalb. Pawel Herczynski qal li d-deċiżjoni ‘awtokratika’ tal-Gvern Ġorġjan qed tikkontradixxi l-politika tal-Gvernijiet preċedenti fi Tbilisi minbarra li sfidat ix-xewqat tal-maġġoranza assoluta tal-Ġorġjani.
U waqt li l-Gvern Ġorġjan qed ikompli jwebbes rasu, l-istħarriġ pubbliku f’din l-eks Repubblika Sovjetika indika li aktar minn 80 fil-mija tal-poplu qed iħarsu lejn il-futur ta’ pajjiżhom bħala parti mill-Unjoni Ewropea.
