Raġel li hedded li “se jġib senter u jispara u joqtol” lis-sieħba tiegħu waqt ġlieda fid-dar tal-koppja, ġie mixli fil-qorti wara li l-inċident ġie evalwat bħala “riskju għoli” mill-pulizija. Il-koppja kienet ilha relazzjoni għal 18-il sena u għandhom tifel ta’ 11-il sena, ħareġ fil-Qorti.
Nhar it-Tnejn il-mara kienet fit-taqsima tal-vjolenza domestika biex tirrapporta lis-sieħeb tagħha, self-employed ta’ 40 sena residenti Ħaż-Żabbar, dwar l-inċident li allegatament seħħ il-Ħadd filgħaxija. Hija sostniet li hu għajjat f’wiċċha, u heddidha bi kliem, “Immur nġib is-senter u noqtlok.”
Meta r-raġel ħareġ, is-sieħba beżgħet li tassew kien se jwettaq it-theddida tiegħu. U hawn sakkret il-bieb bil-biża li kellha. L-għada marret għand il-pulizija biex tagħmel rapport. Il-valutazzjoni tar-riskju tagħha skorja 16, punteġġ għoli.
L-Ispettur Omar Zammit li kull meta l-iskor ikun ‘il fuq minn 14, il-persuna involuta tispiċċa mixlija taħt arrest. Ir-raġel, li ismu qed jinżamm moħbi biex tiġi salvagwardjata l-identità tat-tifel tal-koppja, wieġeb mhux ħati li kkaġuna lill-allegata vittma biża’ ta’ vjolenza, insulentaha u heddidha.
Il-prosekuzzjoni ma oġġezzjonatx għall-ħelsien mill-arrest sakemm il-qorti timponi kundizzjonijiet adegwati u ħarġet ordni ta’ protezzjoni. Il-prosekutur irrimarka li dan jidher li kien l-ewwel inċident bejn il-koppja.
Il-mara minn dak iż-żmien kienet marret toqgħod u marret tgħix ma’ ommha, qal l-ispettur. Il-Maġistrat Nadia Helena Vella laqgħet it-talba għall-ħelsien mill-arrest kontra depożitu ta’ €1,000, u garanzija personali ta’ €4000, li jiffirma darbtejn fil-ġimgħa l-għassa tal-Pulizija u tpoġġa taħt curfew bejn l-10pm u l-5am. Il-qorti ħarġet ukoll ordni ta’ protezzjoni. L-avukati Albert Zerafa u Ryan Christopher Pace kienu l-avukati difensuri.
