L-eks Ministru u issa backbencher tal-Labour Edward Zammit Lewis ma għaddix mill-grilling li sarlu fi Brussel, wara li kien nominat mill-Gvern Laburista sabiex jokkupa l-kariga ta’ Imħallef fi ħdan il-Qorti Ewropeja.
Il-pjan ta’ Robert Abela biex jeħles mill-backbencher Laburista mill-Parlament Malti sfaxxa fix-xejn. Dan għaliex, minkejja li imbuttah b’saħħa biex jeħles minnu bil-pulit, l-Ewropa kellha pjanijiet differenti.
Dan għaliex b’mod ċar uriet li ma għandha l-ebda fiduċja fl-eks Ministru Laburista Zammit Lewis.
F’post fil-midja soċjali, Edward Zammit Lewis qal li ma sarulu l-ebda mistoqsijiet b’rabta ma’ l-kwalifiċi li suppost għandu biex jokkupa din il-kariga, iżda kien mistoqsi fuq ħwejjeġ oħra li – skont hu – ma għandhom x’jaqsmu xejn ma’ din il-pożizzjoni.
Zammit Lewis kompla jgħid illi, waqt dan il-grilling li sarlu t-Tlieta, daħal dubju dwar il-proċess li seħħ f’pajjiżna fejn minnu, intagħżel hu sabiex jiġi nnominat.
Intant, fl-ebda ħin ma ammetta illi ma għaddiex minn dan il-grilling, iżda qal li saritlu ħsara kbira, u li se jkun qed jibqa’ fil-Parlament minkejja – dak li hu ddeskriva bħala “ostakli”, u għalhekk konferma ċara li, l-Ewropa, ma afdatx fin-nomina tal-Gvern Laburista.
Sorsi qrib iċ-Ċentru Nazzjonali Laburista li tkellmu ma’ Net News spjegaw li din ta’ Zammit Lewis hija daqqa ta’ ħarta mhux biss għall-eks Ministru imma għal Robert Abela nnifsu.
Dan għaliex spjegaw li sa mill bidu l-favorita tal-Mexxej Laburista għal kariga ta’ Imħallef fil-Qorti Ġenerali tal-Unjoni Ewropea kienet l-eks ġurnalista tas-Super One Veronique Dalli.
L-istess sorsi spjegaw li l-Prim Ministru prova jwaqqa’ f’nassa lil Zammit Lewis u riedu jirriżenja mill-Parlament qabel l-imsemmi grilling, konxju li l-backbencher kien se jkun qiegħed ifallih.
Madanakollu, b’mod ċar il-pjan ta’ Robert Abela ma rnexxiex għaliex dan baqa’ ma rriżenjalux minn Deputat Parlamentari.
Dan xorta waħda jfisser li issa, kif kien ippjanat inizjalment, il-kandidat li Abela se jimbotta għal flok Zammit Lewis se tkun oħt il-Ministru Miriam Dalli, Veronique Dalli.
