Valletta St Paul’s u Għaxaq Wolves rebħu l-logħbiet rispettivi tagħhom qabel il-konfront dirett bejniethom hekk kif intlagħbet is-sitt ġurnata tal-kampjonat tal-Ewwel Diviżjoni tal-MAFA.
Valletta St Paul’s għelbu lil Ta’ Ġiorni Wanderers 2-1. Il-Beltin skorjaw gowl f’kull taqsima għalkemm ma sabuhiex faċli jinfdu d-difiża soda tal-Wanderers. Kien Andrew Ejike Obetta li poġġa lit-tim mill-kapitali fil-vantaġġ sabiex kmieni fit-tieni taqsima, Matheus de Sousa Verissimo għamilhom 2-0. Lejn l-aħħar tal-logħba, Ta’ Ġiorni ngħataw penalty li ġie skorjat minn George Andrew Marshall.
Referee kien Lorry Sammut.
L-isfidanti l-oħra għat-titlu Għaxaq Wolves irrispondew b’rebħa minima ta’ 1-0 kontra San Ġwann Pro Evolution Academy. Wara taqsima fejn ma kellniex gowls, l-Għaxqin ħallew lejn l-aħħar sabiex aċċertaw ruħhom mit-tliet punti b’Sebastian Nayar li jegħleb lill-goalkeeper avversarju.
Referee kien Ray Tabone.
Issa Valletta St Paul’s u Għaxaq Wolves jiltaqgħu nhar is-Sibt 14 ta’ Diċembru f’konfront li għandu jkun ferm interessanti.
It-tieni diviżjoni
Fit-tieni diviżjoni, Valletta Stars St Dominic saħħew posthom f’ras il-klassifika wara rebħa ta’ 2-1 kontra Attard Edex Kings. Il-Beltin urew l-intenzjonijiet ċari sa mill-bidu u marru minn fuq permezz ta’ Zachary Micallef li mill-viċin għeleb lill-goalkeeper ta’ Attard Stephen Sherin. Qabel tmiem l-ewwel taqsima, l-Istilel Beltin irduppjaw l-iskor permezz ta’ Federico Marine Tejada. Fit-tieni taqsima, Attard naqqsu l-marġni tal-iskor permezz ta’ Andres Aguilera Linates.
Referee kien Peter Abela.
Żebbuġ Youngsters ingħataw walk-over ta’ 2-0 kontra Ħal Far Titans.
It-tielet diviżjoni
Fit-tielet diviżjoni, Swieqi United AFC baqgħu b’punti massimi filwaqt li bdew it-tieni round bil-kbir wara li għelbu lir-rivali Qajjenza ACJ 3-1. Jubril Bolaji Mustapha u Shibin Malijekkal taw vantaġġ doppju għal Swieqi qabel ma’ Jean Paul Barbara naqqas il-marġni tal-iskor għal Qajjenza. Fil-ħin mogħti żejjed mir-referee Alex Grech, Joao Calilo Aiezza issiġġilla r-rebħa għal Swieqi.
KLASSIFIKA – MAFA L-EWWEL DIVIŻJONI
Valletta St Paul’s 18; Għaxaq Wolves 16; Marsa St Michael’s 10; Balluta Barracudas 9; San Ġwann Pro Evolution Academy 4; San Ġiljan Saints, Ta’ Ġiorni Wanderers 1; Mqabba Albions 0.
KLASSIFIKA – MAFA T-TIENI DIVIŻJONI
Valletta Stars St Dominic 13, Senglea Gunners 10; Birżebbuġa St Peter’s AFC; Attard Edex Kings 9; Żebbuġ Youngsters 8; Ħamrun Amateurs 4; Gudja Wanderers 3; Ħal Far Titans 0.
KLASSIFIKA – MAFA T-TIELET DIVIŻJONI
Swieqi United AFC 15; Qajjenza AFC 7; Naxxar Victorians 5; St Paul’s Bay NMFC 1; Mosta Vikings 0.
