Il-grupp Amnesty International – entità ewlenija għall-moniteraġġ tad-drittijiet umani – akkuża lil Iżrael dwar it-twettiq ta’ ġenoċidju fuq il-Palestinjani waqt il-gwerra fil-Medda ta’ Gaza. Sadanittant, Iżrael qed jiċħad bil-qawwi għall-akkuża fost l-istqarrijiet li din qed tibbaża fuq l-istqarrijiet qarrieqa u l-misinformazzjoni.
L-Amnesty, li għandu l-bażi fir-Renju Unit, qal li r-rapport konkluż jirrifletti ‘l-istqarrijiet tal-uffiċjali Iżraeljani fejn qed jiċħdu għall-kwalitajiet umani tal-poplu (Palestinjan) partikulari’. L-istqarrijiet, skont l-akkuża, jinvolvu anki element ta’ ġenoċidju – bir-rapport jirreferi wkoll għall-materjal viżwali u diġitali, minbarra r-rakkonti tax-xhieda.
Iżda waqt li l-Amnesty qed iwissi lill-komunità internazzjonali biex ‘tqum għar-realtà tas-sitwazzjoni’, il-Ministeru Iżraeljan għall-Affarijiet Barranin fisser ir-rapport bħala ‘falz u giddieb’ – bil-kelliema għall-Armata Iżraeljana jsostnu li l-akkużi huma għalkollox infondati minbarra li ma jirriflettux is-sitwazzjoni militari f’Gaza.
Intant, l-entitajiet mediċi f’Gaza qalu li nqatlu tal-anqas 50 Palestinjani oħra f’Gaza fi spazju ta’ 24 siegħa – u wara li t-territorju mill-ġdid kien spiċċa suġġett għar-rejds tal-qawwiet tal-ajru Iżraeljani. L-akbar ammont ta’ vittmi kienu rappurtati fil-kamp ta’ al-Mawasi għar-refuġjati, bl-Iżraeljani jgħidu li huma kienu qed jimmiraw għat-terroristi tal-Ħamas li użaw lir-refuġjati bħala tarka umana.
