Żewġ żgħażagħ ammettew li darbu gravi erba’ żgħażagħ fi ġlieda fil-parkeġġ ta’ Gianpula fis-sigħat bikrin tas-26 ta’ Ottubru. Il-vittmi kollha kellhom inqas minn 18-il sena. Tnejn minnhom weġġgħu serjament, b’wieħed minnhom ikollu bżonn kirurġija korrettiva minħabba ksur f’imnieħru u ġrieħi oħra taħt l-għajnejn.
Erba’ adoloxxenti, kollha rġiel, sadanittant ukoll tressqu l-Qorti t-Tnejn, u li qed jiffaċċjaw akkużi identiċi. Filwaqt li tnejn minnhom ta’ 17 u 19-il sena, wieġbu ħatja, it-tnejn l-oħra, ta’ 18-il sena, ċaħdu l-akkużi. Fil-Qorti ntqal li 12-il siegħa wara l-ġlieda wieħed mill-vittmi mar l-għassa tas-Siġġiewi mal-ġenituri tiegħu biex jirrapporta l-każ. Ma marx qabel għax kellu bżonn assistenza medika l-isptar.
Il-Maġistrat Monica Vella tat il-libertà proviżorja sakemm tingħata s-sentenza għat-tnejn li wieġbu ħatja, u imponiet curfew bejn l-10pm u s-6am. L-akkużati ġew ordnati wkoll jiddepożitaw €500 u garanzija personali ta’ €3000 kull wieħed.
Waqt argumenti fuq pleġġ għall-akkużati l-oħra, il-prosekuzzjoni oġġezzjonat l-aktar minħabba l-biża’ ta’ tbagħbis tal-evidenza. Ladarba l-ħbieb tagħhom jiġu kkundannati, huma jkunu wkoll xhieda obbligati. Il-biża’ ta’ tbagħbis żdiedet darbtejn wara li tnejn miż-żagħżagħ ammettew, sostna l-avukat tal-AĠ Jurgen Dalli.
Il-Qorti qalet li deċiżjoni dwar il-pleġġ se tingħata aktar tard. Fuq talba konġunta mill-avukati tad-difiża kollha, il-Qorti ordnat projbizzjoni fuq l-ismijiet kollha kemm tal-akkużati kif ukoll tal-vittmi peress li wħud minnhom kienu minorenni.
L-avukat tal-AĠ Jurgen Dalli u l-Ispettur James Mallia mexxew il-Prosekuzzjoni. L-avukati Arthur Azzopardi, Jacob Magri, Dustin Camilleri, Nicholas Mifsud, Charlon Gouder u Ramona Attard assistew lill-akkużati. Għal waħda mill-vittmi dehru l-avukati Franco Debono u Marion Camilleri.
Dr. Debono qal lill-Qorti li kulma talbu kien ordni ta’ protezzjoni u kundizzjonijiet adegwati ta’ ħelsien mill-arrest biex jissalvagwardjaw lill-minuri li “wara kollox kien għall-affari tiegħu meta ġie attakkat.”
