Nhar il-Ġimgħa, 13 ta’ Diċembru, ir-raħal pittoresk tas-Siġġiewi ser ikun mibdul f’atmosfera tal-festi tal-Milied meta se jiġi organizzat Villaġġ tal-Milied mill-Kunsill Lokali tas-Siġġiewi mit-3pm ‘il quddiem. L-avveniment ta’ din is-sena, bl-isem “Il-Villaġġ ta’ Nikola”, se joffri ħarġa unika fejn il-maġija ta’ dan iż-żmien tingħaqad mat-tradizzjoni lokali u tkompli ssaħħaħ ir-rabta qawwija tas-Siġġiewi mal-patrun tiegħu, San Nikola, qaddis tant marbut mal-Milied.
Għall-ewwel darba, apparti li se jkun f’qalb il-pjazza tar-raħal, Il-Villaġġ ta’ Nikola se jinfirex ukoll fit-toroq dojoq u antiki tas-Siġġiewi li se jkunu mżejna b’dawl u tiżjin tal-Milied. Dawk li se jżuru dan il-villaġġ se jkunu milqugħa b’atmosfera ħajja fejn it-tradizzjonijiet tal-istaġun jiżżewqu mal-istorja rikka tar-raħal.
Se jkun hemm bankarelli b’ikel tradizzjonali flimkien ma’ suq tal-Milied fejn jinbiegħu oġġetti marbuta ma’ dan iż-żmien. Se jkun hemm ukoll wirja ta’ presepji u bambini, u t-tfal li jattendu jkunu jistgħu jagħmlu dawra bil-karozzella fuq żiemel madwar it-toroq imżejnin. Santa Klaws bla dubbju se jkun preżenti fl-attività fl-islitta tiegħu fejn ikun hemm opportunità li t-tfal jieħdu ritratt miegħu filwaqt li jiktbu ittra ta’ dak li jixtiequ dan il-Milied u jimpustawha f’kaxxa postali apposta. Biex tkompli tiżżewwaq l-atmosfera tal-Milied, se jkun hemm maltempata tal-borra fil-qalba tar-raħal kif ukoll bouncy castles għat-tfal.
Il-mużika mhix se tonqos waqt din l-attività fejn se jkun hemm il-baned tar-raħal flimkien ma’ korijiet tradizzjonali u d-dimostrazzjoni bil-Bambin li se jkomplu jdaħħlu dawk preżenti fl-ispirtu tal-Milied. Dan l-avveniment li jġorr l-isem ta’ San Nikola se jkun ċelebrazzjoni tal-valuri tal-ġenerożità u tal-komunità li tant kienu għal qalb dan il-qaddis marbut mal-Milied.
Il-Villaġġ ta’ Nikola jistieden mill-qalb lill-familji u tfal biex jiġu jgawdu dan il-villaġġ maġiku tal-Milied. Għal iktar informazzjoni, żur il-paġna tal-avveniment fuq https://fb.me/e/44iHjfXyb. Jalla l-ispirtu ta’ San Nikola u l-ferħ tal-Milied li se niċċelebraw nhar it-13 ta’ Diċembru jkompli jħeġġeġ l-hena u l-paċi lil kull min se jżur dan il-villaġġ.
