Is-sensibilizzazzjoni, l-edukazzjoni u l-għarfien dwar liema kontenut jista’ jitqiegħed online b’mod sikur huma kruċjali għall-emanċipazzjoni u s-sikurezza fid-dinja diġitali, enfasizzaw il-kelliema waqt diskussjoni pubblika, fil-Belt Valletta.
Politiċi, esperti legali u fl-industrija, akkademiċi u influencers, ħadu sehem fid-diskussjoni pubblika In-Nisa fl-Era Diġitali: Sigurtà u Setgħa organizzata mill-Uffiċċju ta’ Kollegament tal-Parlament Ewropew f’Malta. Din saret bħala parti mill-ġimgħa għall-ugwaljanza bejn is-sessi li l-Parlament Ewropew qed jimmarka madwar l-UE kollha.
Il-kelliema qablu li biex jitnaqqas id-distakk li għadu jeżisti bejn il-ġeneri fis-suġġetti STEM u l-ħiliet tal-IT jeħtieġ bidla fil-mentalità tradizzjonali li s-suġġetti teknoloġiċi huma għas-subien.“In-nisa f’Malta issa qed joqorbu lejn l-istess livell tal-irġiel f’livelli ta’ ħiliet bażiċi u intermedji, iżda għad hemm bżonn ta’ progress,” innotat Abigail Aquilina, Maniġer għall-Iżvilupp tan-Negozju u s-Sensibilizzazzjoni f’Tech.mt.
“Il-problema tinqala’ fir-rigward ta’ ħiliet avvanzati u impjiegi ta’ livell ogħla,” innotat Marthese Vella, Uffiċjal Kap tat-Teknoloġija għall-Grupp AX u promotur tal-Kamra tal-Kummerċ ta’ Malta tal-karrieri fl-ICT fost in-nisa.
“Tajjeb li ninnutaw li l-karrieri fl-ICT joffru livell ta’ flessibbiltà tali li n-nisa fil-maternità għandhom iħossuhom imħeġġa pjuttost milli skoraġġuti milli jfittxu dawn bħala qasam professjonali”. Hemm ħafna x’wieħed jagħżel f’termini ta’ taħriġ fil-ħiliet tal-ICT f’Malta, iżda kemm il-mentalità kulturali kif ukoll in-nuqqas ta’ informazzjoni dwar l-għażliet jistgħu jkunu qed iżommu lin-nisa lura.
“Fl-edukazzjoni, il-kwistjoni kumplessa kbira hija l-mentalità kulturali. In-nisa għandhom talent tekniku daqs l-irġiel, hija mentalità antika li wieħed jemmen li l-irġiel huma aktar maqtugħin għal karrieri relatati mat-teknoloġija,” enfasizzat Dr Vanessa Camilleri, akkademika fid-Dipartiment tal-Intelliġenza Artifiċjali tal-Università ta’ Malta.
“9 % biss tal-gradwati tagħna fit-teknoloġija huma nisa”. Hija nnotat li “10 snin ilu konna qed ngħallmu lin-nies kif jiktbu l-kodiċi, issa għandna t-teknoloġija biex nagħmlu dan, għalhekk jeħtieġ li ngħallmu lin-nies jaħsbu”.“Uża l-IA bħala għodda, u uża l-ħsieb kritiku,” qalet id-deputat Nazzjonalista Claudette Buttigieg, li enfasizzat il-ħtieġa għal approċċ edukattiv li jgħallem u jħeġġeġ lill-istudenti jaħsbu għalihom infushom.
Il-Membru Parlamentari Maltija nnotat l-importanza tal-liġijiet li jaġixxu bħala deterrent għal ċerta mġiba u enfasizzat l-importanza tal-implimentazzjoni tal-liġijiet.Il-liġijiet jeħtieġ li jinkludu multi li huma “aktar minn twiddiba ħafifa” innotat Dr Claire Cassar, avukat li tispeċjalizza fl-ICT u l-Privatezza tad-Data, li nnotat ukoll id-diffikultà biex jinkiseb rimedju.
Il-liġijiet tal-UE u l-iżviluppi internazzjonali mir-“regoli tal-Intelliġenza Artifiċjali, għall-Att dwar is-Servizzi Diġitali, għad-direttiva dwar il-Vjolenza Kontra n-Nisa, u l-firma tal-UE tal-konvenzjoni ta’ Istanbul“, huma kollha għodod biex jiġu identifikati u protetti d-drittijiet tagħna, innotat l-Eks MPE Josianne Cutajar.
“Meta n-nisa fl-isfera pubblika jiġu kkritikati, jintużaw immaġni sesswali. L-irġiel huma kkritikati b’mod differenti. In-nisa m’għandhomx ikunu soġġetti għal lingwaġġ sessist,” qalet Cutajar. “Id-Direttiva dwar il-Vjolenza Kontra n-Nisa tipprovdi rikors dwar kif wieħed ifittex għajnuna legali u jikseb it-tneħħija ta’ immaġni online”.
Is-sikurezza online tinkludi passi bażiċi iżda importanti li għandhom jittieħdu, deskritti minn Vella bħala passwords b’saħħithom, awtentikazzjoni b’żewġ fatturi, politiki u settings tal-privatezza. “F’każijiet ta’ fastidju online: ħu ritratti tal-iskrin u rrapporta, lill-pjattaformi, bħal Facebook, li għandhom il-politika tal-imblukkar tagħhom stess, u wkoll lill-Pulizija jekk is-sitwazzjoni tkun verament ħażina. Tiżvelax informazzjoni personali sensittiva, u jekk tagħmel hekk, kun ċert li taf min qiegħed jirċieviha”.
“19 % tal-popolazzjoni dinjija nsterqitilha l-identità tagħha,” wissiet l-influencer u eks preżentatur tar-radju Trudy Kerr. “Is-sena l-oħra nsterqu 3 biljun identità u ġew ippubblikati fuq id-dark web. Għandna nirrifjutaw il-cookies. Kull immaġni fuq l-internet qiegħda hemm għal dejjem, inklużi ritratti tat-tfal tagħna. Kemm hemm tjubija fuq l-internet, hemm ukoll dinja sħiħa li hija inqas onorabbli”.
“Is-soluzzjoni mhijiex li nitbiegħdu mill-pjattaformi, iżda li l-politiċi jimbuttaw għal aktar kontroll,” innotat Camilleri. “L-għarfien meta tiġi kondiviża d-data huwa ta’ importanza kbira: il-kondiviżjoni konxja”.
Id-diskussjoni f’Malta kienet parti minn sensiela ta’ avvenimenti dwar l-ugwaljanza bejn is-sessi li saru fil-Parlament Ewropew fi Brussell u madwar l-Ewropa.
