“Għadu ma sarx biżżejjed biex tiġi evitata traġedja oħra bħal dik ta’ Jean Paul Sofia.”
Kien dan li qalet Isabelle Bonnici, omm Jean Paul Sofia waqt laqgħa ta’ diskussjoni bit-titlu “Ġustizzja għall-Vittmi tal-Kostruzzjoni f’Malta”, li saret fil-Parlament Ewropew. Isabelle Bonnici qalet li kif f’Malta għandna kultura ta’ bullies u cowboys f’dan is-settur, li jippruvaw iwaqqfu lil dawk li jipprotestaw biex ma jħalluhomx ikomplu jikkawżaw ħsara.
Waqt id-diskussjoni li ttellgħet mill-Membru Parlamentari Ewropew, Peter Agius ħeġġeġ lill-awtoritajiet lokali biex jindirizzaw in-nuqqasijiet regolatorji sistematiċi fis-settur tal-kostruzzjoni li għadhom qed ipoġġu l-ħajjiet f’riskju. Ibbażat fuq dan li nstab u rrakkomandat fl-inkjesta Sofia, l-MEP Peter Agius talab għal riformi b’saħħithom u fl-istess waqt responsabbli biex tiġi żgurata l-ġustizzja għall-vittmi kwalunkwe u jiġu evitati iktar traġedji.
L-inkjesta Sofia sabet aktar minn 40 miżura kritika u meħtieġa, inkluż superviżjoni aktar stretta, eliminazzjoni ta’ permessi fast-track, u jkunu mandatorju r-rapporti ġeoloġiċi u ta’ sigurtà meta jsir xogħol ta’ skavar. Agius ikkritika r-rispons reattiv tal-gvern, u qal li “ma tagħmilx sens li jkollok il-leġiżlazzjoni mingħajr infurzar.”
Id-deputat Nazzjonalista Jerome Caruana Cilia pparteċipa wkoll fid-diskussjoni u wissa dwar il-konsegwenzi serji, bl-istorja kapaċi tirrepeti ruħha jekk ma jittiħdux azzjonijiet deċiżivi.
L-MEP Peter Agius temm l-intervent tiegħu b’sejħa għall-azzjoni u appell lill-Kummissjoni Ewropea biex ikun superviżjoni u gwida lill-awtoritajiet Maltin biex jiġi żgurat li r-riformi fis-sigurtà jiġu implimentati b’mod effettiv. Dan l-appell sab l-appoġġ tal-parteċipanti kollha.
