Falliment ieħor għall-Ministeru għall-Intern, is-Sigurtà u x-Xogħol hekk kif l-Awditur Ġenerali jikkonferma li hemm bżonn aktar sforz u ħeġġa biex issir il-bidla neċessarja fil-Ħabs ta’ Kordin.
Kien dan li ntqal fi stqarrija maħruġa mix-Shadow Minister għall-Intern, is-Sigurtà u r-Riformi, Darren Carabott bil-Partit Nazzjonalista jagħmel referenza għar-rapport tal-Uffiċċju Nazzjonali tal-Verifika (NAO) ippubblikat riċentement, bit-titlu Follow-Up Audits Report 2024 – Volume II, b’mod partikolari għat-taqsima A Strategic Overview on the Correctional Services Agency’s Operations at the Corradino Correctional Facility – li jsegwi performance audit ieħor li kien ġie ppubblikat f’Diċembru 2021.
L-għan ta’ dan ir-rapport ġdid hu biex jaraw jekk ir-rakkomandazzjonijiet li tressqu fl-2021 ġewx implimentati fi ħdan it-tmexxija tal-Ħabs f’dawn is-snin – proprjament sal-aħħar ta’ Settembru 2024.
Fil-qosor, wara tliet snin, ir-rapport tal-Awditur Ġenerali wasal għal dawn il-konklużjonijiet:
- Ftit li xejn sar progress dwar ir-rakkomandazzjoni għal żamma ta’ ordni, u ndafa fil-Ħabs
- Parzjalment ġew implimentati r-rakkomandazzjonijiet biex jiġu rinnovati zoni fil-Ħabs ta’ Kordin, tant li l-ebda ċella ma ġiet rinnovata fi stat li suppost kienet fil-mira tal-faċilità
- Ftit li xejn sar progress dwar ir-rakkomandazzjoni għall-estensjoni tal-Ħabs wara li waqaf il-proġett fl-istadju tal-iskavar minħabba li l-proġett qabeż l-allokazzjoni tal-budget
- Parzjalment ġew implimentati r-rakkomandazzjonijiet dwar studju fuq il-bżonn tal-ammont ta’ uffiċjali fi ħdan il-Ħabs – turija ċara li l-uffiċjali u ħaddiema preżenti qed jaħdmu żżejjed minħabba nuqqas ta’ riżorsi umani
- Ma ġewx implimentati r-rakkomandazzjonijiet dwar performance assessments dwar l-uffiċjali, u l-ħarsien tax-xogħol u l-kundizzjonijiet tagħhom
- Ma ġewx implimentati r-rakkomandazzjonijiet dwar taħriġ għall-uffiċjali kollha
- Ftit li xejn sar progress dwar ir-rakkomandazzjonijiet ta’ ingaġġ ta’ professjonisti fil-Care, Re-integration and Education Unit, kif ukoll li tali żieda ssir abbażi ta’ studju
- Ftit li xejn sar progress dwar ir-rakkomandazzjonijiet għall-bidla leġiżlattiva biex tgħolli l-funzjoni ta’ rijabilitazzjoni tal-Ħabs ta’ Kordin
- Ma ġewx implimentati r-rakkomandazzjonijiet dwar opportunitajiet edukattivi għall-priġunieri
- Ftit li xejn sar progress dwar proviżjoni ta’ placements tax-xogħol għall-priġunieri
- Parzjalment ġew implimentati r-rakkomandazzjonijiet dwar abbozzar ta’ policies u proċeduri
- Ma ġewx implimentati b’mod sħiħ id-disinn u l-implimentazzjoni ta’ Offenders Management System
Fi tliet snin l-unika rakkomandazzjoni li twettqet kienet dik li jsir care plan għal kull priġunier fil-Ħabs ta’ Kordin, internal work placements jingħataw permezz ta’ framework sistematiku, li l-uffiċjali jiġu mħarrġa fil-qasam tar-rijabilitazzjoni u l-kura.
L-istess rapport tal-Awditur Ġenerali jgħid li minn 17-il rakkomandazzjoni fl-2021, tlieta biss ġew implimentati b’mod sħiħ – u fil-konklużjoni tiegħu jistqarr li hemm bżonn aktar ħeġġa u sforz fil-Ħabs ta’ Kordin.
Dan hu ċertifikat ieħor ċar ta’ falliment għall-Ministru għall-lntern, is-Sigurtà u x-Xogħol Byron Camilleri – li issa għandu iswed fuq l-abjad, għal darba oħra, rapport li juri għalih ir-riforma fis-sistema tal-Ħabs u r-riforma tal-persuna mhijiex prijorità.
Il-Partit Nazzjonalista jemmen li jekk is-sistema tal-Ħabs tfalli u r-riforma tal-persuna tfalli, il-kriminalità tgħolli rasha u tieħu vantaġġ – u dan iwassal għal konsegwenzi serji fuq in-nies u s-soċjetà kollha.
