Allegat middleman fir-racket tal-benefiċċji soċjali kien iffirma li daħal għax-xogħol fl-impjieg tiegħu fid-dipartiment tax-xogħlijiet pubbliċi fil-ħin tal-arrest fil-bar tiegħu f’Ħal Tarxien. Dustin Caruana, imlaqqam ‘Bobo’, kien arrestat fil-bar minkejja li kien immarkat li kien preżenti għax-xift tiegħu fil-Ministeru mis-7am u s-7pm, qal fix-xhieda tiegħu l-Ispettur Wayne Rodney Borg.
Xi 11-il benefiċċjarju indikaw lil Caruana bħala l-persuna li daħħalhom fl-iskema, u qalu li ltaqgħu miegħu fil-bar. Oħrajn qalu li Caruana kien kiseb ċertifikati mediċi u mediċini biex isostnu l-applikazzjoni frawdolenti tagħhom u tahom parir dwar kif għandhom iwieġbu meta jidhru quddiem il-bord mediku li jevalwa t-talbiet għal diżabbiltà.
F’Settembru tas-sena l-oħra, kien żvelat li t-tabib tal-familja u Eks Membru Parlamentari Laburista Silvio Grixti kien suspettat li kien fiċ-ċentru ta’ racket li kien ilu għaddej snin biex jgħin mijiet ta’ nies jirċievu b’mod frawdolenti benefiċċji ta’ diżabbiltà ta’ kull xahar li ma kinux intitolati għalihom.
Il-frodi rat lill-applikanti jirċievu ħlasijiet fix-xahar ta’ medja ta’ €450 mid-dipartiment tas-sigurtà soċjali. Aktar dettalji dwar l-allegat racket ħarġu quddiem il-Maġistrat Rachel Montebello meta Grixti, Caruana, Luke Saliba, Roger Agius u Emmanuel Spagnol rritornaw il-Qorti biex jiffaċċjaw akkużi dwar l-allegati rwoli tagħhom fil-frodi massiva tal-benefiċċji tad-diżabbiltà.
Caruana, li ismu ħareġ bħala ssuspettat middleman, oriġinarjament kien impjegat fil-Korporazzjoni għas-Servizzi tal-Ilma qabel ġie issekondat fil-ministeru tax-xogħlijiet pubbliċi bħala ‘watchman’. Is-sieħba tiegħu u oħtu wkoll ibbenefikaw b’mod frawdolenti permezz tar-racket, semgħet il-Qorti.
Dakinhar tal-arrest ta’ Caruana, xi ħadd kien iffirma l-karta tal-attendenza tiegħu iżda l-firem ma kinux jaqblu, xehed l-ispettur. Benefiċċjarji kienu aktar imħeġġa’ jidħlu fl-iskema frawdolenti minħabba l-elezzjoni ġenerali kienet waslet fil-qrib.
Ħarġet aktar evidenza hekk kif il-Pulizija analizzat applikazzjonijiet suspettużi bejn Mejju u Ottubru 2020, b’mandati ta’ arrest miksuba għal 23 suspettat, li ħafna minnhom ma kkoperawx. Iżda tnejn minn dawk suspettati li bbenefikaw b’mod frawdolenti mill-iskema qalu lill-Pulizija li kisbu dokumenti mingħand Saliba, b’wieħed jgħid li kien għamel dan kontra ħlas ta’ €5,000.
Filwaqt li ieħor insista li ma kienx jaf lil Saliba, l-investigaturi ssuspettaw mod ieħor mal-arrest tiegħu, ir-raġel ħareġ mill-uffiċċji tal-FCID u mar dritt lejn il-pastizzeria ta’ Saliba, xehed l-Ispettur Borg. “Hu ma xtara xejn u telaq ftit wara,” qal l-Ispettur.
Meta arrestat fid-dar tiegħu fl-Imsida, Saliba qal lill-Pulizija li kien iltaqa’ ma’ Roger Agius, dak iż-żmien ix-xufier ta’ Grixti, fil-każin tal-boċċi ta’ San Gwann. Qal li kien Agius li ħajru japplika għall-allowance ta’ diżabbiltà severa, u qal li dan qed isir “għax l-elezzjonijiet kienu joqorbu”.
Saliba saħaq li qatt ma żamm flus għalih minkejja li rċieva ‘l fuq minn €23,000 f’benefiċċji soċjali. It-tfajla tiegħu u qraba oħra wkoll gawdew mir-racket u ġew akkużati wkoll kriminalment, spjega Borg. Ix-xhud wera chats bil-mowbajl bejn Saliba u wieħed mill-benefiċċjarji frawdolenti li tefgħu dawl fuq il-ħidma tar-racket, bil-kuntatt ta’ Saliba salvat bħala ‘Luke skema’ (“Luke scheme”).
€6.8 miljun b’qerq fuq 340 każ. Xehed ukoll id-Direttur Ġenerali tal-Income Support and Compliance George Cremona, li ppreżenta ħarsa ġenerali ta’ xkien ifisser ir-racket għall-kaxxa pubblika. Sa Marzu, kienu ġew identifikati 321 każ frawdolenti, numru li tela’ għal 340 sad-data tas-seduta tal-Qorti nhar it-Tnejn.
Aktar minn €6.8 miljun ġew froditi, b’inqas minn terz (kważi €1.9 miljun) irkuprati. Il-Qorti semgħet li f’216-il każ dawk involuti kienu daħlu fi ftehim ta’ ħlas lura mad-dipartiment filwaqt li 68 applikant ħallsu lura l-ammonti kollha. 61 każ ieħor ma laħqu l-ebda ftehim.
Mit-340 każ, 150 kienu applikaw għal maħfra presidenzjali. Jason Azzopardi jirrinunzja għall-qosor bħala avukat ta’ Agius. Fil-bidu tas-seduta tal-lum, il-Maġistrat Rachel Montebello qalet li l-avukat Jason Azzopardi kien ippreżenta nota biex jinforma lill-Qorti li kien qed jirrinunzja għall-brief tal-klijent tiegħu.
Agius ma kienx assistit f’din is-seduta. Spjega li ma setax jingaġġa avukat ieħor qabel ma jitħalla jiġbed flus mill-kontijiet bankarji tiegħu. Iżda ma kellu l-ebda problema li l-Qorti tisma’ lix-xhieda kif skedat sakemm id-dritt tiegħu li kontroeżaminahom fi stadju aktar tard kien debitament riżervat.
Il-każ ikompli f’Jannar.
L-avukat tal-AĠ Charmaine Abdilla flimkien mal-Ispetturi Wayne R Borg u Shaun Friggieri qed imexxu l-prosekuzzjoni. L-avukati Franco Debono u Arthur Azzopardi huma avukati ta’ Grixti. L-avukati Michael Sciriha u Roberto Spiteri huma avukati ta’ Caruana u Spagnol. L-avukati Josè Herrera u Matthew Xuereb huma l-avukati ta’ Saliba.
