Iċ-Ċentru Kulturali taċ-Ċina f’Malta (CCC) għadu kemm fetaħ il-wirja ‘Eternal Confucius: Theme Photo Exhibition’, li se tkun disponibbli għall-pubbliku sal-aħħar ta’ Jannar 2025. Din il-wirja tistieden lill-viżitaturi jesploraw il-ħajja, il-filosofija, u l-influwenza globali ta’ Konfuċju, wieħed mill-aktar ħassieba u edukaturi rispettati fl-istorja.
Imtella’ miċ-CCC flimkien mal-Uffiċċju Nazzjonali tat-Turiżmu taċ-Ċina, b’sapport min-Netwerk ta’ Entitajiet Internazzjonali ta’ Culturalink u mad-Dipartiment tal-Kultura u t-Turiżmu tal-Provinċja ta’ Shandong, il-wirja tenfasizza l-wirt dejjiemi ta’ Konfuċju. Permezz ta’ ġabra affaxxinanti ta’ ritratti, il-wirja turi kif it-tagħlim profond tiegħu ħalla marka sinifikanti fuq iċ-ċiviltà Ċiniża, filwaqt li ispira diversi nies madwar id-dinja.
Il-wirja hija maqsuma fi tliet taqsimiet, b’kull waħda toffri tagħrif dwar il-għerf ta’ Konfuċju u r-rilevanza tiegħu fil-preżent.
Il-wirja tinkludi wkoll ritratti mill-isbaħ ta’ siti prominenti u artefatti importanti. Fost l-attrazzjonijiet l-oħra li jidhru fir-ritratti hemm ilbies tradizzjonali u rappreżentazzjonijiet ċerimonjali li jagħtu ħajja lill-filosofija tiegħu.
Id-dħul huwa mingħajr ħlas ħalli tingħata opportunità lil kulħadd li jgawdi din l-esperjenza kulturali għanja.
