Il-Gvern Laburista qed jimbotta “Awtorità tal-Permessi” minflok Awtorità tal-Ippjanar li tħares il-wirt nazzjonali u tippjana għall-futur tal-pajjiż ibbażat fuq viżjoni ċara u trasparenti.
Dan ingħad fi stqarrija konġunta bejn ix-Shadow Ministers Stanley Zammit, Rebekah Borg u Julia Zahra fejn spjegaw li l-Qorti għal darba oħra rrevokat permessi li qatt ma kellhom jinħarġu wara li l-Awtorità tal-Ippjanar ġebbdet l-interpretazzjoni ta’ policies flessibbli żżejjed.
Dan qed ikompli jiġri għaliex il-Gvern Laburista żarma lil din l-Awtorità mill-kapaċità u l-kompetenza neċessarja biex tkun tista’ tieħu deċiżjonijiet ta’ kwalità. Il-Gvern qed jibqa’ ċass quddiem deċiżjonijiet ħżiena u ksur tad-deċiżjonijiet tal-Qorti.
Il-Partit Nazzjonalista flimkien mas-soċjetà ċivili kixfu kif l-Awtorità tal-Ippjanar, bħalma rajna fil-każ ta’ Villa Rosa, taġixxi biss fuq struzzjonijiet tal-Kabinett wara li dan ikun ftiehem mal-iżviluppaturi.
Din is-sitwazzjoni hija art fertili għal korruzzjoni, fejn min hu l-aktar b’saħħtu jkompli jħawwel.
Wara li l-Gvern Laburista abdika mir-responsabbiltà tiegħu bħala s-sid ta’ Forti Chambray biex jikkonserva u jirrestawra dan il-ġojjell fil-gzira ta’ Għawdex, l-istess Gvern naqas milli jipproteġi l-barracks ta’ żmien l-Ingliżi permezz ta’ skedar ogħla.
Riżultat ta’ dan, elementi arkitettoniċi ikoniċi ta’ importanza kbira kemm fl-estetika kif ukoll fil-kuntest storiku tagħhom mhux se jibqgħu jitgawdew b’mod sħiħ.
Il-Ministru tal-Ippjanar Clint Camilleri, li kien hu stess li aċċetta bħala konsulenta persuna mingħajr l-ebda kompetenza li tħallset għal xogħol li ma għamlitx, ma jistax inissel fiduċja li l-Awtorità tal-Ippjanar għandha xi farka ħeġġa li tħares dan il-patrimonju. L-istess jgħodd għas-Sovrintendenza tal-Wirt Kulturali.
Il-Partit Nazzjonalista ilu jinsisti li wasal iż-żmien li pajjiżna ma jibqax iqis l-iżvilupp bħala attività li trid issir akkost ta’ kull ħsara li tista’ jagħmel.
Bil-wegħdiet fiergħa u n-nuqqas ta’ azzjoni, il-Gvern immexxi minn Robert Abela qed jagħti l-barka tiegħu lill-atroċitajiet fl-iżvilupp u lill-qirda ta’ ġawhar storiċi.
Ħadd ma għadu jemmen il-paroli tal-Prim Ministru Robert Abela.
Robert Abela ilum jgħid ħaġa u għada jagħmel oħra. Eżempju ċar ta’ dan hija l-wegħda li għamel ftit xhur ilu, li permessi li jkunu taħt appell ikunu sospiżi sakemm jinqata’ l-appell.
Is-soluzzjoni għal dawn il-ħniżrijiet hija bidla fit-tmexxija tal-pajjiż.
Għandna bżonn tmexxija li tparla inqas u taġixxi aktar.
M’għandniex bżonn tmexxija li tagħmel bidliet nofs kedda u li jwasslu biss għal sistema burokratika li taġevola lil min hu b’saħħtu u tkisser lid-dgħajjef.
Il-Partit Nazzjonalista se jkompli jieqaf lil policies inġusti u li huma biss passatur billi jagħmel l-ambjent dritt fundamentali tal-Maltin u l-Għawdxin kollha. L-ambjent huwa wkoll il-wirt storiku u kulturali tagħna lkoll.
Neħtieġu deċiżjonijiet serji, trasparenti, konsistenti, li jnisslu fiduċja u jagħtu s-serħan tal-moħħ.
Għalhekk, waqt li jkompli l-proċess ta’ djalogu u konsultazzjoni biex ifassal pjan strateġiku olistiku għall-ambjent u l-iżvilupp, il-Partit Nazzjonalista jwiegħed li, sa mill-ewwel ġurnata fit-tmexxija tal-pajjiż, jimplimenta proċess ta’ re-engineering komplet tal-Awtorità tal-Ippjanar sabiex din tkun indipendenti mill-politiċi u mill-ispekulaturi u sabiex tkun awtorità ġusta u soda.
Il-Partit Nazzjonalistsa jniedi r-riforma radikali tant meħtieġa sabiex dak li jagħmilna min aħna jibqa’ magħna għall-ġenerazzjonijiet li ġejjin u ma jkunx vittma tal-iżvilupp mingħajr pjan.
