Il-kumpilazzjoni ta’ raġel Kolumbjan, akkużat li qatta biċċiet katavru, u poġġa l-partijiet tiegħu f’bagalja, u mbagħad xeħtu fil-baħar, se tibda tinstema’ nhar it-Tnejn, 23 ta’ Diċembru quddiem il-Maġistrat Astrid May Grima.
Is-suspettat, Andres Leonardo Gamboa Duran ta’ 43 sena minn Cucuta, il-Kolombja, kien tressaq il-Qorti nhar is-Sibt quddiem il-Maġistrat Marse Ann Farrugia u qed iwieġeb mhux ħati tal-akkużi kriminali. L-Erbgħa filgħodu x-xorti messet lill-Maġistrat Grima biex tisma’ l-provi fil-każ li xxokkja pajjiż.
Duran, li joqgħod l-Imsida, ġie arrestat tlett ijiem wara li l-Pulizija għamlet sejba makabra meta ġew infurmati b’bagalja f’wiċċ l-ilma tul The Strand, f’Tas-Sliema. Il-bagalja kien fiha l-fdalijiet imqaċċta ta’ ġisem.
Is-Sibt li għadda l-Pulizija qalet f’konferenza tal-aħbarijiet dwar id-delitt li l-akkużat għalissa mhux qed ikun akkużat bi qtil peress li l-evidenza ssuġġeriet li l-vittma kienet diġà mejta meta l-katavru tqatta’ biċċiet. L-investigazzjonijiet tal-Pulizija għadhom għaddejjin.
Duran jinsab mixli li ppromwova organizzazzjoni kriminali, traffikar tad-droga, assoċjazzjoni kriminali, ħasil ta’ flus, ħabi ta’ ġisem, u li pprova jgħatti reat. Duran deher fil-Qorti b’hoodie abjad bis-slogan ‘Gang Signs’ fuqu. Huwa kien assistit minn interpretu.
L-investigaturi jemmnu li l-vittma hija wkoll ta’ nazzjonalità Kolombjana. Idejh u saqajh kienu nqatgħu u tpoġġew f’boroż tal-plastik separati ġewwa l-bagalja. Huwa kien qed iġorr ukoll 101 kapsula tal-kokaina ġewwa l-istonku tiegħu.
Il-bagalja kellha sticker tal-prezz imwaħħla, u dan għen lill-Pulizija biex jinstab il-ħanut minn fejn inxtrat, minn ħanut f’San Ġwann. Filmati CCTV estratti mill-ħanut irriżultaw li l-persuna li xtrat il-bagalja l-ġurnata ta’ qabel kienet ukoll xtrat mannara mill-maħżen.
L-investigaturi mbagħad segwew lis-suspettat sa blokk appartamenti tal-Imsida. Wara li kisbet mandat ta’ arrest mingħand maġistrat, il-Pulizija daħlet. Waqt il-konferenza l-Assistent Kummissarju tal-Pulizija u l-investigatur ewlieni Keith Arnaud ta dettalji dwar il-każ u kien qal: “Aħna nemmnu li l-vittma kien diġà mejjet meta jdejh u saqajh inqatgħu. Ma kien hemm l-ebda sinjali esterni ta ‘vjolenza,” huwa qal.
L-awtopsja ssuġġeriet li l-vittma mietet fgata. Arnaud qal li l-Pulizija mhux se tkun qed tressaq akkużi ta’ qtil kontra l-akkużat bħalissa iżda ssuġġerixxa li dan kollu jista’ jinbidel jekk tinħareġ evidenza ġdida. Arnaud qal li l-Pulizija segwew lis-suspettat u identifikaw il-ħanut minn fejn xtara l-mannara li ntużat fir-reat u l-bagalja użata biex jintrema l-katavru fejn dawn inxtraw minn San Ġwann.
Sabu lis-suspettat ukoll ma’ raġel Portugiż ta’ 39 sena, li qed jiffaċċja akkużi kriminali separati relatati mad-droga. Fil-proprjetà ġew skoperti oġġetti oħra relatati mat-traffikar tad-droga. Il-mannara li ntużat instabet fi proprjetà oħra fl-Imsida, li l-Pulizija temmen li kien minn fejn tmexxa l-katavru qabel tpoġġa fil-bagalja.
Bħalissa l-investigaturi qed jaħdmu biex jistabbilixxu kif iż-żewġ individwi kienu marbuta u għaliex il-kapsuli tal-kokaina li nstabu fl-istonku tal-vittma ma ġewx estratti qabel ma l-katavru ntrema. Nhar is-Sibt il-Maġistrat laqgħet talba għal ordni ta’ ffriżar fuq l-assi ta’ Duran.
F’dan l-istadju ma saret l-ebda talba għal libertà proviżorja u Duran inżamm arrestat.
L-Ispetturi Kurt Colombo Zahra u Wayne Camilleri flimkien mal-avukati tal-AĠ Kaylie Bonett u Dejan Darmanin qed imexxu l-Prosekuzzjoni. L-Avukat Yanica Barbara Sant assistiet lill-akkużat bħala għajnuna legali.
Il-provi huma mistennija li jibdew jinstemgħu fl-10.30am.
