Raġel ta’ 41 sena, bi problema ta’ droga, ġie kundannat 26 xahar ħabs wara li ammetta li seraq madwar €400 minn tliet ħwienet f’Ġunju li għadda, inkluż inċident li fih żamm lil sid il-ħanut billi ippontalu sikkina. Christian Cumbo kien wettaq is-serqa armata tiegħu qabel is-6am tat-13 ta’ Ġunju, 2024.
Fil-mira kien ħanut tal-merċa f’Ħal Balzan. Cumbo, b’wiċċu mgħammad, hedded lill-grocer, mara ta’ 49 sena, b’sikkina u talabha flus kontanti. Cumbo ħa €250 u telaq ‘il barra. Il-mara ma weġġgħetx waqt is-serqa.
Jumejn wara huwa seraq minn ħanut ieħor tal-merċa f’Tas-Sliema, ukoll qabel is-6am fil-15 ta’ Ġunju, fejn seraq €125. Cumbo wettaq serqa oħra fis-17 ta’ Ġunju wkoll filgħodu, din id-darba fil-mira ta’ ħanut tal-logħob f’Birkirkara, fejn seraq €22.50.
Cumbo ffaċċja ħames akkużi fil-Qorti, inklużi serq aggravat, li żamm lil tal-grocer kontra r-rieda tagħha u li kellu pussess illegali ta’ sikkina. Cumbo inizjalment wieġeb mhux ħati għall-akkużi, iżda biddel il-fehma tiegħu wara li ntlaħaq ftehim ta’ negozjar aktar kmieni dan ix-xahar, f’forma ta’ patteġġament,
Il-prosekuzzjoni qablet li tirrakkomanda sentenza ta’ 26 xahar ħabs jekk Cumbo jwieġeb ħati tal-akkużi kollha, b’Cumbo jrid ukoll jirritorna l-flus misruqa u jħallas l-ispejjeż relatati mal-ħatra tal-esperti tal-Qorti: li f’dan il-każ kienu jammontaw għal €1,318.54.
Minkejja li l-Qorti mhix marbuta bi ftehim bħal dan, il-Maġistrat Gabriella Vella qablet li ssegwi r-rakkomandazzjoni, u saħqet li ż-żmien li Cumbo qatta’ f’kustodja preventiva għandu jitqies bħala żmien li jrid jitnaqqas mis-sentenza.
Waqt il-proċeduri kien iċċarat ukoll li Cumbo kien qed jiġġieled b’vizzju tad-droga, li wassal lill-maġistrat biex ipoġġih taħt ordni ta’ kura għal ħames snin.
