Flyers huma r-rebbieħa tat-3 edizzjoni tal-Marindex Christmas Cup organizzata din il-ġimgħa minn Paola Volleyball Club. F’dan it-tournament ħadu sehem tliet timijiet li kienu Paola Executive Security u Depiro mill-Ewwel Diviżjoni, u Flyers mis-Super League.
Flyers għelbu lil Paola Executive Security 3-1 u Depiro 3-0. Paola Executive Security rebħu kontra Depiro 3-0 biex spiċċaw it-tieni. Fi tmiem dan it-tournament, il-President tal-Paola Volleyball Club, Dr Kenneth Vella, ippreżenta t-trofew rebbieħ lil Louise Vella, captain tal-Flyers.
Paola Volleyball Club jirringrazzja lill-isponsors ewlenin tal-kampjonat, Marindex Trophies, kif ukoll lill-isponsors tal-klabbs, Executive Security Services, Maypole, Yes2Health Fitness Club, HandsOn Systems, Maypole, Izibet u Dragonara Casino And Brasserie.
Bħala parti mill-impenn ta’ Paola Volleyball Club li jkompli jsaħħaħ in-nursery, il-klabb qed jippjana li jagħti lill-plejers żgħażagħ tiegħu esperjenza internazzjonali barra minn Malta. Aktar informazzjoni se tingħata fil-jiem li ġejjin. Barra minn hekk, grazzi għall-ftehim kollaborattiv bejn il-klabb ta’ Raħal Ġdid u t-tim Taljan tas-Serie A1, Akademia Sant’Anna, il-klabb tagħna se jkollu l-opportunità li jorganizza kamp ta’ taħriġ f’Marzu, li se jitmexxa mill-kowċ professjonali Taljan, Norma Pilota.
