Colin Schembri
Tigers…………………..75
Starlites JSD……….119
(28-25)(16-30)(21-30)(10-34)
Ic-champions Starlites JSD ħadu s-seba’ rebħa fil-kampjonatmeta għelbu lil Tigers 119-75. Starlites kienu mingħajr Joseph Davies fil-waqt li Tigers kienu b’sitt players. Il-partita minkejja r-rebħa ta’ Starlites kienet pjaċevoli u ta’ punteġġ għoli speċjalment fl-ewwel żewġ sessjonijiet. Il-partita kellha bidu bilanċjat bit-Tigers jieħdu vantaġġ ta’ 3 punti wara trippla minn Keith Micaller. Starlites kellhom risposta minn Benjamin Curran li kien attiv ferm fl-ewwel taqsima però Israel Lockamy ħalla lil Tigers viċin wara trippla. Għal xi ħin Tigers baqgħu fuq quddiem qabel ma’ trippla ta’ Kai Fabri poġġiet lil Starlites minn fuq. Għal xi ħin Tigers reġgħu ħadu l-vantaġġ u trippla ta’ David Constantino rathom itemmu l-ewwel taqsima fuq quddiem 28-25. Fit-tieni sessjoni Starlites bdew aħjar u marru minn fuq wara trippla ta’ Kai Fabri. Għal xi ħin Tigers kellhom risposta minn Micaller u Hamparsoumian qabel ma Starlites għamlu run ta’ 13-0 bi trippla ta’ Matthew Scerri. Micaller u Hamparsoumian wieġbu għal Tigers però Starlites daħlu jistrieħu 55-44 minn fuq.
It-tielet taqsima fetħet bi trippla minn Lockamy għal Tigers bi Starlites ikollhom il-punti ta’ Trevon Reddish u Curran. Lockamy għamel trippla oħra għal Tigers bi Starlites iwieġbu bi break qawwi ta’ 16-2 għal skor ta’ 85-65. Fl-aħħar sessjoni spikkat run ta’ 25-2 minn Starlites fosthom bi trippli ta’ Andrew Aquilina u Kolten Mortensen u l-baskets fost l-oħrajn minn Louie Farrugia u Kai Fabri hekk kif ma kienx hemm dubju għar-riżultat finali u Starlites ħarġu rebbieħa 119-75.
Tigers: S. Hamparsoumian 14, I. Lockamy 28, K. Micaller 12, M. Jalkh, D. Constantino 10, S. Saakian 11.
Starlites JSD: B. Curran 35, A. Aquilina 8, K. Fabri 5, I. Felice Pace 2, M. Fabri 11, L. Riolo 2, M. Scerri 7, L. Farrugia 2, K. Xuereb 5, K. Mortensen 17, T. Reddish 25.
Referees: Fiorentina Ciurariu, Nicky Azzopardi, Wendell Lim
Valletta Lions………..68
Sigma Depiro…………77
(17-24)(15-14)(16-17)(20-22)
Depiro kisbu rebħa importanti f’konfront missielet kontra Valletta Lions fiż-żona tal-play-offs biex ħadu r-raba’ rebħa fil-kampjonat. Kien hemm wirjiet individwali tajbin fuq iż-żewġ naħat minn players bħal Nikola Bozovic u Cameron Cornelius għal Depiro u s-solitu Piotr Stelmach għal Valletta. Nikola Vasovic li kien għaddej minn mument mill-aqwa kien ikkontrollat b’difiża organizzata minn Depiro. Wara li Valletta għamlu l-ewwel basket minn Eric Terry, Depiro wieġbu b’run ta’ 10-4 grazzi għal Cornelius u trippla ta’ Sean Galea. Valletta wieġbu bi break ta’ 8-0 bi trippla ta’ Stelmach u l-punti ta’ Terry biex reġgħu marru fuq quddiem 15-10. Hawn però Depiro kellhom run tajba ta’ 14-2 b’erba’ trippli, tnejn minn Brandon Porter u tnejn oħra ta’ Bozovic u biex għalqu l-ewwel sessjoni fuq quddiem 24-17.Fit-tieni taqsima, Depiro kellhom trippla ta’ Miguel Brincat fil-waqt li l-punti ta’ Valletta fl-ewwel ħames minuti ġew biss mill-free-throw line. Depiro komplew b’run ta’ 10-1 bi trippla oħra ta’ Bozovic biex fetħu vantaġġ ta’ 13 -il punt 37-24. Valleta komplew b’aktar free-throws hekk kif kellhom biss żewġ baskets biex Depiro daħlu jistrieħu sitta minn fuq 38-32.
Fit-tielet taqsima, Depiro komplew iżommu l-kontroll grazzi għal Cornelius, li b’sensiela ta’ azzjonijiet individwali mexxa l-attakk tagħhom fi break qasir ta’ 10-4 Vasovic u Terry wieġbu għal Valletta li kellhom ukoll trippla minn Stelmach biex naqqsu d-distakk għal 9 punti 39-48. Ħames punti fuq kull naħa minn Stelmach u Brincat ħallew lil Depiro fuq quddiem fi tmiem il-perjodu 55-48. Sar-raba’ minuta tal-aħħar sessjoni, l-vantaġġ ta’ Depiro kiber għal 14 -il punt 66-52 hekk kif Depiro għamlu tlett trippli konsekuttivi minn Bozovic u Brincat. Depiro komplew iwieġbu għal punti ta’ Valletta u trippla ta’ David Bugeja qabel bdiet l-aħħar minuta serħitilhom rashom mir-riżultat u minkejja l-aħħar 5 free-throws ta’ Valletta, Depiro rebħu l-partita 77-68.
Valletta Lions: N. Grech 2, F. Mifsud Bonnici, P. Stelmach 25, A. Attard, D. Schembri, J. Camilleri, N. Vasovic 11, S. Vincic 6, E. Terry 24.
Sigma Depiro: S. Galea 4, D. Bugeja 4, N. Bozovic 16, N. Zivkovic, A. Trapani, D. Tomasi 4, B. Porter 14, M. Brincat 14, C. Cornelius 22, M. Debattista.
Referees: Bernard Vassallo, Gordon Barbara, Nestor Rincon
Luxol Sherries Estates…..82
Hibernians……………………93
(13-12)(23-25)(25-25)(21-31)
Hibernians irritornaw għar-rebħ wara żewġ telfiet konsekuttivi meta għelbu lil Luxol Sherries Estates 93-82. Darron Howard u Nathan Xuereb mexxew l-attakk ta’ Luxol hekk kif bejniethom qasmu 66 punt mit-82 finali fil-waqt li għal Hibs Tederick Wolfe spiċċa b’35 punt. Il-partita kienet bilanċjata tant li l-vantaġġ inbidel għal 22 darba u għal 15 -il darba kien hemm parita. Il-logħba bdiet bil-punti ta’ Howard għal Luxol, iżda Ivan Demcesen u Wolfe wieġbu għal Hibernians b’punti fiż-żona. Wolfe mexxa run ta’ 6-0 għal Hibs li wasslithom fuq quddiem 8-4 però Luxol wieġbu bi tlett baskets konsekuttivi minn Caleb McCrary u Xuereb biex għalqu s-sessjoni fuq vantaġġ minimu ta’ punt 13-12. It-tieni taqsima fetħet bi trippla fuq kull naħa minn Luke Farrugia u Howard u wara komplew ġejjin aktar punti fuq iż-żewġ naħat fosthom trippla minn Stefan Simic u għalkemm sa’ nofs is-sessjoni Luxol kienu għadhom erba’ punti minn fuq 28-24. Hawn Hibs kellhom run ta’ 9-0 però Howard u Xuereb komplew iżommu lil Luxol viċin bil-punti tagħhom u fl-intervall id-distakk kien ta’ punt wieħed favur Hibs 37-36.
Fit-tielet perjodu l-partita kompliet tkun ibbilanċjata hekk kif Luxol kellhom aktar trippli minn Xuereb u Stefan Cappello b’Wolfe iwieġeb b’żewġ trippli għal Hibernians. Demcesen u Gouder ukoll żiedu punti tagħhom hekk kif għal xi ħin iż-żewġ timijiet bdew jirrispondu lil xulxin bil-Hibs iżommu vantaġġ ta’ punt wieħed 61-60.Sa’ nofs l-aħħar sessjoni Luxol kienu għadhom 4 minn fuq 75-71 wara trippli minn Nenad Bukva, Xuereb u JP Schembri. Hawn Hibs ħasdu lill-avversarji bi break deċisiv ta’ 15-0 fejn fost l-oħrajn kien hemm trippla ta’ Gouder u punti minn Wolfe u Demcesen għal skor ta’ 86-75. Luxol wieġbu bil-free-throws ta’ Howard però l-ħin kien kontra tagħhom u Hibs setgħu jagħlqu bil-punti ta’ Wolfe u Derek Brown u jieħdu r-rebħa fuq skor ta’ 93-82.
Luxol Sherries Estates: D. Howard 43, E. Caruana Montaldo, A. Azzopardi, I. Azzopardi, V. Jandric, JP Schembri 3, N. Xuereb 23, M. Vassallo Pulis, N. Bukva 3, CJ Mccrary 7, M. Matijevic, S. Cappello 3.
Hibernians: N. Cassar, T. Wolfe 35, D, Brown 15, P. Attard, L. Attard, L. Farrugia 6, A. Axiaq 4, M. Gouder 9, M. Attard, M. Mallia, I. Demcesen 18, S. Simic 6.
Referees: Zvezdan Dobrosaviljevic, Fiorentina Ciurariu, Wendell Lim.
