Fi żjara li għamlet fil-Kumpless Sportiv f’Ħal Kirkop, il-President ta’ Malta Myriam Spiteri Debono segwiet l-aħħar tħejjijiet li għaddejjin b’rabta ma’ L-Istrina li tittella’ ta’ kull sena l-għada tal-Milied.
Fost l-oħrajn il-President żaret is-sett li minnu se tkun qed tittella’ x-xandira televiżiva ta’ tnax-il siegħa fis-26 ta’ Diċembru bis-sehem ta’ diversi preżentaturi mill-istazzjonijiet televiżivi ewlenin f’pajjiżna flimkien ma’ personalitajiet oħra.
Hija ltaqgħet ukoll mal-ħaddiema u voluntiera li kienu għaddejjin bil-ħidma tagħhom kemm fl-armar u fi tħejjijiet loġistiċi oħra.
F’kummenti li tat, il-President Myriam Spiteri Debono semmiet kif il-bżonnijiet huma kbar u għaldaqstant appellat għall-ġenerożità tal-poplu Malti u Għawdxi f’din il-festa ta’ solidarjetà.
Jakkumpanjaw lill-President ta’ Malta kien hemm iċ-Chairperson tal-Malta Community Chest Fund Sina Bugeja flimkien ma’ diversi uffiċjali mill-Uffiċċju tal-President.
L-Istrina tiftaħ f’nofsinhar bil-messaġġi mill-ogħla awtoritajiet f’pajjiżna u tibqa’ sejra sa’ nofsillejl, b’xandira diretta fuq l-istazzjonijiet lokali.
