Skont data miġbura u ppublikata minn Google l-isport iddomina l-iktar suġġetti mfittxija fuq din is-search engine matul l-2024.
Fil-fatt, in-nies l-aktar li fittxew kien dwar il-Copa America u anke l-EURO 2024. Wara l-futbol, f’din il-lista nsibu l-cricket – bin-nies ifittxu tagħrif dwar it-Tazza tad-Dinja tal-cricket.
U fir-raba’ post kien hemm il-partita tal-cricket Indja kontra l-Ingilterra.
Fuq tema kompletament differenti, il-mewta tal-istilla tal-One Direction, Liam Payne ddominat id-data ta’ Google. Mewta li ħasdet lid-dinja kollha nkluż dawk l-imsejħa directioners li saħansitra għamlu velja f’Malta.
Fil-kategorija tal-aħbarijiet, l-elezzjoni presidenzjali tal-Istati Uniti kienet l-aktar suġġett imfittex madwar id-dinja tant li qabeż l-interess fil-logħob Olimpiku, li għamluha sat-tielet post.
Is-sħana eċċessiva u l-urugan Milton qanqlu wkoll interess sinifikanti fit-tfittxija tant li kklassifikaw fit-tieni u r-raba’ fil-lista ta’ tfittxija globali.
Fejn jidħol id-divertiment, il-komiku u attur veteran Katt Williams qabeż il-lista globali tal-aktar atturi mfittxija. Personalitajiet bħal Ella Purnell u Hina Khan kisbu wkoll post fost l-aqwa ħamsa.
