Emilia Pérez, musical bil-lingwa Spanjola dwar sid tad-droga Messikan li jibdel is-sess tiegħu, kien ir-rebbieħ ewlieni tal-Golden Globe Awards li saru nhar il-Ħadd.
Il-film rebaħ erba’ unuri, fosthom tal-aħjar supporting actress li mar għand Zoe Saldaña, u tal-aħjar film fil-ġeneru ta’ comedy u musical.
Rebbieħa oħra kienu jinkludu Demi Moore u Kieran Culkin, filwaqt li l-blockbuster Wicked ħa l-premju għall-kisbiet tal-box office.
The Brutalist, film ta’ tliet sigħat u nofs dwar perit Ungeriż li jibni ħajja ġdida fl-Istati Uniti wara t-Tieni Gwerra Dinjija, rebaħ tliet unuri – tal-aħjar film drammatiku, l-aħjar attur għal Adrien Brody, u l-aħjar direttur għal Brady Corbet.
