Wasal fi tmiemu ir-restawr fil-Kunvent ta’ Santu Wistin u t-tħejjija ta’ ċentru ta’ Interpretazzjoni li beda aktar minn sitt snin ilu biex b’hekk dawk li jżuru din il-binja jkunu jistgħu jaraw fdalijiet li jmorru lura sas-sena 1571 mal-bini tal-Belt Valletta.
Sc
Net News żar din il-binja u ltaqa’ ma’ Fr Leslie Gatt, provinċjal tal-Agostinjani li spjegalna kif din il-binja toffri diversi attrazzjonijiet fosthom l-artal u xi l-pilastri tal-ewwel knisja li nbniet tħares lejn il-port il-Marsamxett, kappella u partijiet mill-kunvent u għadhom wieqfa minkejja d-diversi snin li għaddew minn fuqhom.
Ta’ interess partikolari huwa wkoll il-fatt li partijiet mill-kannierja kienu jservu ta’ kenn għal tant nies waqt l-attakki tat-tieni gwerra dinjija sakemm imbagħad meta l-gwerra qlielet tħaffer anke x-xelter li issa huwa anke aċċessibbli għall-Pubbliku. Apparti l-kannierja fejn kienu jindifnu l-patrijiet, fi spazji fl-istess livell wieħed jista japprezza anke essebizzjoni żgħira ta’ dak li jsawwar il-festa Maltija partikolarment għat-turisti li jżuru din il-binja fix-xhur tax-xitwa.
Il-partijiet tal-binja miftuħa għall-pubbliku huma maqsuma fuq diversi livelli bl-ewwel livell li jmur lura sal-ewwel kostruzzjoni fuq is-sit fis-seklu 16, u żewġ livelli oħra bil-binja maestuża tal-Knisja u l-Kunvent li nbnew f’nofs is-seklu 18 fuq stil barokk li kien popolari f’dawk iż-żminijiet.
Fil-librerija tal-Kunvent insibu anke diversi kotba ta’ valur u anke sezzjoni bil-memorabilja tal-poeta Malti Rużar Briffa li kien jgħix qrib l-istess binja. Fost l-affarijiet esebiti nsibu diversi ċertifikati tal-poeta u anka t-typewriter tiegħu.
Waqt li x-xogħol wasal fl-aħħar fażijiet tiegħu, l-ispazji qegħdin ġa jinfetħu għall-pubbliku biex ikunu jistgħu jiġu apprezzati waqt li jintużaw għal diversi inizjattivi.
