Il-ġurament tal-ħatra tal-President-Elett tal-Istati Uniti Donald Trump, se jsir fil-binja tal-Capitol minħabba l-kesħa estrema li qed taħkem Washington f’dawn il-jiem. Dan kien konfermat minn Trump innifsu permezz ta’ messaġġ fuq il-media soċjali.
L-inawgurazzjoni ta’ Trump se ssir nhar it-Tnejn li ġej. U kuntrarrju għal dak li jiġri issoltu, hu se jwassal l-ewwel messaġġ tiegħu lin-nazzjoni mir-rotuna ta’ Capitol, u mhux fuq barra. Dan hekk kif bħalissa, diversi zoni tal-Istati Uniti jinsabu affetwati minn temperaturi baxxi u kesħa estrema.
L-inawgurazzjoni u ċ-ċerimonji kollha marbuta mal-ħatra ta’ Donald Trump se jkunu qed jixxandru b’mod dirett fuq Net TV, waqt edizzjoni speċjali tal-programm NETLIVE. Bix-xandira tibda għall-ħabta tal-5:15pm.
L-aħħar ħatra ta’ President li saret ġewwa kienet ta’ Ronald Reagan fl-1985 – anke dakinhar, il-kesħa kienet waħda konsiderevoli.
Minħabba l-elementi, jidher li anke l-parata tradizzjonali li ssir f’Jum l-Inawgurazzjoni se ssir fuq ġewwa. Għal dan il-għan, qed tiġi armata il-Capital One Arena, fejn wieħed se jkollu wkoll il-possibbiltà isegwi l-ġurament tal-ħatra. U wara, l-istess Trump se jingħaqad mal-folla miġbura f’din l-arena.
Din iċ-ċerimonja se tissiġilla r-ritorn ta’ Donald Trump fil-White House. Hu se jservi bħala is-47 President fl-istorja tal-Istati Uniti.
