Matthew James għadu kemm nieda l-album debuttanti Ashes to Ashes. Insibu l-kollaborazzjoni ma’ Michela Pace, Owen Leuellen u l-Orkestra Filarmonika ta’ Malta.
Magħruf għal siltiet bħal ‘Paul’, ‘Young Again’, ‘Tbissem’ u ‘People’ li kellha l-kollaborazzjoni tal-Orkestra Filarmonika ta’ Malta, Matthew James qed iniedi l-album debuttanti tiegħu bħala artist solista.
Jgħid hekk: “Wara li qattajt il-biċċa l-kbira tas-snin li għaddew niffoka fuq il-kitba tal-kanzunetti, il-kollaborazzjoni u l-produzzjoni ta’ mużika għal artisti oħra lokalment u anke barra minn Malta, issa kien wasal iż-żmien li nippreżenta korp ta’ xogħol li jkun aktar intimu, aktar jiżvela… il-jien”.
L-album Ashes To Ashes huwa ġabra ta’ kanzunetti dwar l-imħabba u l-mibegħda, il-ħajja u l-mewt, is-saħħa u l-mard, u t-tlugħ u l-inżul tal-ħajja. Ikompli jgħid li dawn huma kanzunetti li jfakkruh fil-kobor li jista’ jikseb il-bniedem mingħajr ma jinsa l-oriġini umli tiegħu, it-trab. “Dan il-ħsieb dejjem litteralment isammarni.”
Ashes to Ashes jiġbor fih 12-il silta interessanti li fihom toħroġ l-artistrija ta’ versatilità mużikali ta’ Matthew James, kif ukoll il-ħila tal-kitba ta’ kanzunetti li fihom x’togħmod, iżda li jinżlu tajjeb u jappellaw għal udjenzi varji – fi kliem ieħor, kanzunetti tajba, album li għoġobni.
Hemm il-kollaborazzjoni mal-kantanta Michela fil-kanzunetta espliċita ‘Under Preassure’. Jikkollabora wkoll ma’ Owen Leuellen fil-kanzunetta ‘Revolution’, filwaqt l-Orkestra Filarmonika ta’ Malta tinstema’ fis-silta ‘People’, liema kanzunetta kienet tnediet xi ġimgħat ilu bħala single.
Insibu wkoll żewġ kanzunetti bil-Malti, ‘Mhux Xorta’, maħruġa sena ilu, u ‘Taħt it-Tapit’.
Prodott minn Howard Keith u Matthew James u mixed u mastered minn Howard Keith f’Jagged House Studios, l-album Ashes To Ashes issa huwa disponibbli fuq Spotify u l-pjattaformi kollha tal-istreaming, u se jkun disponibbli fuq il-vinyl f’dawn il-jiem.
It-tracks kollha f’dan l-album huma:
Messing with a Psycho, Ashes to Ashes, If I ever Lose You, Under Pressure, Mhux Xorta, Paradise, People, Lose Control, Revolution, All About You, Taħt it-Tapit, u Too Much.
Ashes to Ashes huwa disponibbli fuq Spotify: https://shorturl.at/2OEv1
