Il-President ġdid tal-Istati Uniti, Donald Trump qal li pajjiżu dieħel ‘f’era tad-deheb’ u meta se jgawdi mill-ġdid ir-rispett tad-dinja bħala potenza ewlenija.,…Potenza li tibbża fuq il-politika ta’ ‘America First’ u li se tagħti priorità fuq kollox lid-demokrazija, il-prosperità u l-ħelsien — fost it-tisħiħ tas-sigurtà nazzjonali….Trump, fl-istess ħin, ħabbar l-20 ta’ Jannar bħala Jum il-Liberazzjoni u qal li l-Gvern tiegħu se jaħdem u jistinka biex jikkonfronta kull kriżi ‘bid-dinjità u s-saħħa neċessarja’.
Sadanittant, hu għamilha ċara li l-awtoritajiet Amerikani qed jaħsbu diġà fl-‘invażjoni diżastruża’ tal-barranin kriminali fl-Istati Uniti. Fl-istess ħin, qed qed tidħol fis-seħħ diġà il-kampanja koordinata għad-diportazzjoni tal-immigranti li infiltraw is-soċjetà Amerikana ‘bl-influwenzi l-ħżiena’ u li ‘mgħandhomx id-dritt li jibqgħu fl-Istati Uniti.’
Dan wara li Trump, minuti ilu, kien ħa l-ġurament bħala s-47 President Amerikan waqt ċerimonja fir-‘rotunda’ tal-US Capitol f’Washington u fejn hu wiegħed biex jipproteġi u jiddefendi lill-Kostituzzjoni ta’ pajjiżu….. Ċerimonja li għaliha attendew l-eks Presidenti Amerikani, il-biljunarji fil-qasam tat-teknoloġija ( fosthom Elon Musk, il-proprjetarju ta’ X ) u l-uffiċjali nominati għall-Kabinett ġdid tal-Istati Uniti.
Fuq barra, fil-Capitol Arena, kien hemm folol kbar tal-partitarji ta’ Trump li riedu jkunu qrib kemm jista’ ikun tal-avveniment inawgurali minkejja l-friża u fejn huma kellhom jissapportu t-temperaturi li niżlu sew taħt iz-zero.
Donald Trump ma tilifx żmien biex jitkellem dwar ‘l-establishment’ — jew grupp ta’ elitisti — li, fi kliemu, ikkontrollaw lill-Gvern preċedenti għall-iskaptu tal-poplu. Intant, Trump għamilha ċara li se jaddotta politika riġida fil-konfront tal-immigrazzjoni illegali anki fl-aħjar interessi tas-sigurtà.
‘Is-sovranità tagħna se irritorna u l-ġustizzja se tissaħħaħ għall-ġid ta’ kull Amerikan — b’kull ċittadin jista’ iserraħ rasu minn Gvern leġittimu u kapaċi li se jpatti għan-nuqqasijiet tal-aħħar erba’ snin taħt il-Presidenza preċedenti’, kien kumment sinifikanti ta’ Trump fost l-applawż tan-nies fir-‘rotunda’.
Trump lanqas ma tilef l-opportunità biex jattakka lill-Gvern tal-eks President Joe Biden dwar kif mexxa l-kriżi tal-immigranti — u fejn tenna li l-pajjiż se jegħleb l-isfidi, filwaqt li jkattar ‘klima ta’ fiduċja aktar milli sitwazzjoni maħluqa mill-eks establishment’ ….Entità li hu fissirha bħala ‘waħda radikali u korrotta’.
Il-President tenna li l-eks-Amministrazzjoni provdiet il-protezzjoni għall-‘kriminali perkolużi li daħlu illegalment fl-Istati Uniti’ waqt li sostna li l-Gvern preċedenti naqas milli jiddefendi l-fruntieri tal-Istati Uniti minkejja l-fondi għad-dispożizzjoni tiegħu.
Trump insista li l-Istati Uniti se tkun ‘aktar eċċezzjonali minn qatt qabel’ u meta hu ottimist li l-Amerikani qed jidħlu f’era ġdida ta’ suċċessi — bl-Istati Uniti għandha taħtaf l-opportunità biex tinfluwenza mill-ġdid lid-dinja bħala potenza. Għaldaqstant hu insista li għandu l-mandat biex ‘jelimina l-politika ta’ tradiment li affettwat daqstant ħażin lill-Amerikani’.
Meta tkellem dwar is-sistema tas-saħħa fl-Istati Uniti, Trump qal li dan għandu wisq tan-nuqqasijiet minkejja li l-Gvern preċedenti nefaq aktar flus flusha minn kwalunkwe Gvern fid-dinja,
Hu wiegħed ukoll li s-sistema edukattiva minn issa ‘il quddiem se taċċerta li l-ġenerazzjonijiet preżenti u tal-futur ikunu kburin b’pajjiżhom — ‘kuntrarju għal dak li seħħ fl-aħħar erba’ snin’.
Donald Trump, imbagħad, irrefera għall-attentat fuq ħajtu fejn hu żgiċċa b’miraklu minn tir sparat lejh minn sniper li kien fuq bejt ta’ bini u qal li hu għadda minn ‘aktar esperjenzi minn kwalunkwe President ieħor’. Hu tenna li ma mietx dakinar għaliex ‘Alla ried li hu jirritorna lill-Istati Uniti għall-pajjiż b’saħħtu li ilu magħruf għalih’.
Il-President ikkonferma li se jiffirma direttiva eżekuttiva li tiddikjara emerġenza nazzjonali mal-fruntiera tal-Istati Uniti mal-Messiku — u fejn se tieqaf mal-ewwel ‘l-infiltrazzjoni ta’ pajjiżu bil-mezzi illegali’….Dan ukoll waqt li l-Gvern qed jibda l-proċess biex jirritorna l-miljuni tal-‘kriminali barranin’ lejn il-postijiet ta’ oriġini. Trump fl-istess ħin ikkonferma li l-cartels tal-kriminali ( u tad-droga) minn issa se jkunu kalkulati bħala organizzazzjonjiet għat-terroristi barranin fl-Istati Uniti.
Applawż speċjali, waqt id-diskors, kien għall-kumment ‘Drill baby Drill’ minn Trump meta l-pajjjiż qed jindirizza l-kriżi tal-enerġija nazzjonali — u meta l-Gvern tiegħu, issa, hu impenjat biex iżid it-tħaffir għaż-żejt u l-gss fl-artijiet tal-Istati Uniti.
Qabel id-diskors ta’Trump, JD Vance, l-eks Running Mate Repubblikan, kien ħa l-ġurament bħala l-Viċi-President ġdid tal-Istati Uniti.
(Se jkomplu l-aġġornamenti fil-minuti li ġejjin)
