Fil-belt Żvizzera ta’ Davos, din il-ġimgħa beda jitlaqqa’ l-Forum Ekonomiku Internazzjonali – organizzazzjoni indipendenti li ġġib flimkien politiċi, akkademiċi u leaders minn madwar id-dinja kollha.
U fost dawk li indirizzaw lill-mexxejja miġbura f’Davos, kien hemm David Beckham – eks captain tat-tim nazzjonali Ingliż, u personalità li għadu influwenti sal-lum il-ġurnata.
Fid-diskors tiegħu, Beckham tkellem dwar in-nuqqas ta’ opportunitajiet indaqs. U insista li ħafna tfajliet “jinżammu lura”.
David Beckham qal li hu jrid jara li bintu jkollha l-istess opportunitajiet bħal ħutha s-subien – u dan jgħodd għat-tfajliet kollha.
