HiTT Academy WH Middle East u Alpha Gewo baqgħu ras imb ras fl-ewwel post tal-klassifika tal-kampjonat tal-Ewwel Diviżjoni tat-Table Tennis fejn baqgħu jżommu t-tliet punt vantaġġ fuq l-eqreb rivali tagħhom MITTC Butterfly.
Alpha Gewo għelbu 4-2 lil Alpha Alberta Group għalkemm it-tim mill-Akkademja tal-HiTT kien bye matul din il-ġimgħa. Sadanittant, it-tim fit-tielet post MiTT Butterfly xejn ma sabuha faċli sabiex jegħlbu l-isfida ta’ HiTT Academy Midea Airconditioning 4-3.
F’logħbiet oħra, Top Spin TTA Roxon għelbu lil Alpha Calleja Ltd 4-2 filwaqt li kien hemm dominju assolut minn Top Spin TTA Andro li għelbu lil Mosta Gunners 6-0.
Fit-tieni diviżjoni, Valletta HiTT Academy baqgħu bir-rekord perfett sa mill-bidu tal-istaġun wara skor pożittiv ta’ 5-1 kontra Top Spin TTA Hexer.
Fit-tielet diviżjoni, it-timijiet mill-Akkademja ta’ Sharp Shot, iġifieri TT Academy Xiom, TT Academy Jekyll and Hyde u TT Academy Petrolea qed jokkupaw l-ewwel tliet postijiet fil-klassifika filwaqt li f’sezzjoni A tar-raba’ diviżjoni hemm Alpha Youths li qed jikkmandaw, l-istess kif qed jagħmlu MITTC Tenergy f’sezzjoni B.
