Wara li erbat ijiem ilu, Flimkien għal Ambjent Aħjar (FAA) irrappurtat erba’ sulari illegali li qed jinbnew fuq blokka ta’ Stivala f’Tas-Sliema, każ li l-Awtorità tal-Ippjanar (PA) diġà kienet taf bih, ix-xogħol xorta qed ikompli biex jiżdied sular ieħor waqt li l-PA tgħid li qed tinvestiga dan il-każ ta’ kostruzzjoni li għandu permess għal 9 sulari, iżda qed jiżdied għal aktar minn 13-il sular.
Dan is-sit hu kopert minn permessi PA 3533/13 u PA 6534/16 għal massimu ta’ 9 sulari. Minflok, il-bini diġà tela’ għal 13-il sular, bi ksur tal-permess oriġinali ta’ 9 sulari.
L-FAA fi stqarrija appellat lill-Kamra tal-Periti (KTP) u lill-banek biex jagħmlu sehemhom biex jeliminaw dan l-abbuż mifrux.
L-FAA qalet ukoll li metri ’l bogħod, pjattaformi ta’ kafetteriji, qed joħolqu kaos fit-traffiku minħabba vetturi tal-kostruzzjoni. Anke rapporti dwar dawn il-problemi ġew injorati. Dan wara li mixer tal-konkos fuq Tower Road sploda lbieraħ filgħaxija, u weġġa’ ħaddiem b’mod gravi.
Fissret ukoll li l-iżvilupp żejjed f’Malta qed jikkawża tbatija fuq ir-residenti kemm mentalment kif ukoll fiżikament, kif ukoll qed tnaqqas il-kwalità tal-ħajja fl-irħula tagħna.
Fakkret li n-‘New York Times’ ippubblikat artiklu dwar it-trasferiment lejn pajjiżi barranin, u wissa lill-qarrejja dwar ir-reputazzjoni ta’ Malta bħala pajjiż korrott. Semmiet li abbużi bħal dawn mhux biss jagħmlu ħsara lill-komunitajiet, iżda wkoll lis-settur tat-turiżmu, is-servizzi finanzjarji, u l-investiment barrani dirett fl-ekonomija tagħna.
