Tliet ġuvintur, sewwieq ta’ 20 sena u żewġ passiġġiera ta’ 21 sena u 22 sena, qegħdin
jinżammu arrestati wara li allegatament instabu fil-pussess ta’ qratas tad-droga kokaina.
Il-ġuvintur ġew arrestati matul il-lejl ta’ bejn it-Tlieta u l-Erbgħa, waqt kontroll tat-traffiku ta’
rutina li sar fi Triq Diċembru Tlettax, il-Marsa.
Dan wara li l-Pulizija osservat vettura tal-għamla Toyota tieqaf aktar ‘il fuq minn fejn kienu,
b’persuna li kienet fiha dehret tarmi oġġett mill-vettura. Irriżulta li l-oġġett mormi kien flixkun
tal-ħġieġ li madwaru kien hemm mat-18-il qartas b’sustanza suspettata kokaina. Fil-vettura nstabu wkoll madwar 10 qratas oħra ta’ sustanza suspettata kokaina.
L-investigazzjonijiet tal-Pulizija għadhom għaddejjin filwaqt li l-Maġistrat Philip Galea Farrugia ħatar inkjesta.
