Id-Deputat Mexxej Laburista, Membru Parlamentari Ewropew tal-Labour u Viċi President tal-S&D, Alex Agius Saliba, jirriżulta li għandu ħafna ħin x’jaħli hekk kif daħal f’botta u risposta totali fuq Facebook.
Kollox beda hekk kif il-ġbejna mill-ħalib tan-nagħaġ ingħatat il-protezzjoni mill-Unjoni Ewropea.
Qabel xejn, l-ewwel prova jimmina r-reputazzjoni tal-President tal-Parlament Ewropew Roberta Metsola billi b’għajn impekkabbli u reqqa liema bħala identifika li biċċa ġbejna li l-MEP Nazzjonalista kellha f’idejha f’ritratt ma kinitx tan-nagħaġ imma tal-baqar.
Minnufih wieġbu l-produttur ta’ dawn il-ġbejniet, li ġibidlu l-attenzjoni li huma tan-nagħaġ u saħansitra stiednu biex idewwaqhomlu.
Hawnhekk l-MEP Laburista, konvint li l-ġbejna kienet tal-baqar, saħansitra ħass li kellu jmeri min jaħdem bħala bidwi. L-agħar, però, li mhux talli attakkah b’mod partiġjan iżda saħansitra ħass il-ħtieġu li mingħalih jittanta jirredikolah. Dan, kollu fuq il-midja soċjali ta’ Facebook.
Intant, waqt dawn il-battibekki kollha li fih kien involut Alex Agius Saliba, li fih impenjattiv tiegħu spiċċa f’battibekk ieħor b’rabta ma’ dawn il-ġbejniet – din id-darba mal-paġna The People of Malta.
Jirriżulta li Agius Saliba għamel użu minn ritratti ta’ din il-paġna mingħajr il-kunsens tal-mexxejja tal-grupp, fejn saħansitra r-ritratt ippubblikat minn Agius Saliba kellu l-logo mneħħi.
Iżda prontament, meta affaċċjat b’tali akkużi, id-Deputat Mexxej Laburista wieġeb fil-kummenti u qal li mhux hu – iżda s-Segretarju Parlamentari Alicia Bugeja Said li għamlet użu minn tali ritratti…u li neħħiet il-logos.
U wara li farfar kollox fuq Bugeja Said, u prattikament lil seħbitu ramiha għal ħalq l-ilpup – The People of Malta saħqu kif Agius Saliba lanqas biss refa’ responsabbiltà tal-post tiegħu, filwaqt li stqarrew li anke kkuntattjaw lil Alicia Bugeja Said…liema post ġiet tranġata aktar minn 28 siegħa wara.
Jidher li fl-iskeda qawwija tiegħu, minkejja t-tliet pożizzjonijiet ta’ portata li għandu Alex Agius Saliba xorta waħda jsib il-ħin biex l-ewwel jidhol f’battibekki fuq il-ġbejniet, li jindika li ma kellux raġun…u sussegwentament ifarfar l-azzjonijiet tiegħu fuq deputati Laburisti oħrajn.
